Presidenti qipriot, Nicos Anastasiades ka pritur në një takim homologun e tij serb, Aleksandër Vuçiç këtë të premte.
Gjatë konferencës së përbashkët për shtyp, Anastasiades tha se Qipro respekton sovranitetin dhe integritetin territorial të Serbisë, si dhe rrugën e saj drejt Bashkimit Evropian.
Nga ana tjetër, presidenti i Qipros ka përmendur edhe Kosovën, për të cilën tha se pavarësia e saj është jo e ligjshme.
“Qipro e konsideron pavarësinë e Kosovës të paligjshme. Në të njëjtën kohë, unë përsëris pozicionin e qartë të autoriteteve qipriote për respektimin e sovranitetit dhe integrimit të Serbisë”, tha presidenti qipriot.
Më tej, ai tha se Qiproja e konsideron Serbinë si një nga kandidatet më kryesore për t’iu bashkuar BE-së.
Aleksandër Vuçiç tha në konferencën e përbashkët për shtyp se Anastasiades kishte pranuar lutjet e tij për angazhimin në arenën ndërkombëtare në lidhje me Kosovën.
Sipas Vuçiç, Anastasiades do t’u shkruajë të gjithë liderëve evropianë për të paralajmëruar për pasojat e mundshme të të gjitha lëvizjeve të Prishtinës.
“I kërkova atij të informonte dhe paralajmëronte partnerët evropianë për pasojat e mundshme të lëvizjeve të Prishtinës dhe ai më tha se do t’u dërgonte letra të gjithë liderëve. Unë jam mirënjohës sepse e di se sa mirë dëgjohet zëri i tij në të gjitha kryeqytetet evropiane”, tha Vuçiç.
Presidenti e falënderoi Qipron për mbështetjen e sinqertë ndaj Serbisë në rrugën e saj drejt BE-së dhe në ruajtjen e integritetit territorial dhe sovranitetit të vendit. Ai e falënderoi veçanërisht Qipron për mbështetjen që i dha Serbisë në Interpol, pra në parandalimin e përpjekjes së fundit të Prishtinës për t’u bashkuar me organizatën.
Presidenti serb i shprehu mirënjohjen e tij të gjithë qytetarëve të Qipros për mbështetjen e vendit të tij dhe tha se Serbia do të qëndronte me popullin dhe autoritetet qipriote./ TIRANA TODAY
