Hetimi rreth vrasjes së futbollistit Daniel Correa po mban pezull Brazilin, pasi tashmë historia e tij është kthyer në një telenovelë me seri, për shkak të deklaratave kontradiktore dhe fakteve që po zbulojnë gënjeshtra.
I akuzuari për vrasjen e futbollistit, Edson Brittes Júnior, si dhe vajza e tij 18-vjeçare Allana Brites, u shfaqën në një video ku tregonin versionin e tyre të ngjarjes, duke pretenduar se Daniel Correa përdhunoi bashkëshorten e Edson Brittes Júnior dhe ky i fundit kreu një krim pasioni, kur gjeti futbollistin në dhomë me bashkëshorten.
Megjithatë, nëna e futbollistit nga Sao Paulo deklaron se autori i krimit ka gënjyer, gjë që mbështetet edhe nga një dëshmitar anonim dhe nga disa foto në Whatsapp.
Trupi i futbollistit u gjend të shtunën e shkuar në një pyll, pranë një rruge dytësore, me fytin të prerë dhe organet gjenitale të këputura.
KONTRADIKTAT E SË BIJËS, ALLANA BRITES
“Kur hapëm derën, Correa ishte mbi mamanë time dhe po mundohej ta përdhunonte. Ajo po bërtiste, ndërsa ai nuk po ndalej, ndaj gjithë bota do e kishte sulmuar”, tha 18-vjeçarja Allana, e cila e kishte ftuar futbollistin në një mbrëmje për të festuar ditëlindjen e saj.
Megjithatë, e ëma e futbollistit, Eliana Correa, tregoi edhe një provë që kundërshtonte deklaratën e 18-vjeçares. Pas zhdukjes së futbollistit, 12 orë më vonë Eliana nisi t’i dërgonte mesazhe Allana-s, duke e pyetur ku ishte Danieli. Allana e siguroi se ishte nisur për në shtëpi dhe se e puthi para se të ikte. “Duhet të jetë në ndonjë hotel këtu afër. Po shkoj të kërkoj me prindërit”, i shkruante Allana, për ta qetësuar. Më pas, kur u zbulua trupi pa jetë i futbollistit, Allana i shkroi së ëmës mesazh: “O zot, nuk është e mundur”.
Në videon ku jep versionin e ngjarjeve, e bija e vrasësit të futbollistit siguron që nuk ishte shoqe me Daniel Correan dhe se njihej prej pak kohësh, por ndërkohë në Instagram ekzistonte një foto ku Correa ishte në shtëpinë e Allana-s edhe para një viti, sërish për festën e ditëlindjes.
KONTRADIKTAT E TË DYSHUARIT, EDSON BRITTES
Sipërmarrësi i njohur me nofkën “Juninho” rrëfeu krimin nëpërmjet një videoje. Edhe versioni i tij ka disa gjëra që nuk shkojnë. “I lava dhëmbët, i vesha pizhamet dhe e çova të flinte”, tha ai për bashkëshorten.
Megjithatë, më pas dolën foto të Daniel Correa-s në shtrat me Cristiana Brittes, ndërsa kjo flinte qetësisht, ndërsa nuk kishte veshur pizhame, por rrobat me të cilat kishte qenë në festën e ditëlindjes së vajzës, shkruan telesport.
“Shqeva derën dhe e gjeta mbi gruan time, e cila bërtiste dhe kërkonte ndihmë”, tha Edson Brittes, por edhe kjo deklaratë ngjall dyshime, pasi një dëshmitar tha që dera ishte hapur normalisht, pa goditje. Gjithashtu, dëshmitari tha se babai i Allana-s u kërkoi të pranishmëve që të tregonin të njëjtin version të historisë.
MESAZHET WHATSAPP
Në qarkullim kanë dalë edhe foto të futbollistit me femrën “e përdhunuar”, ndërsa Daniel i shkruante një shoku se po bënte qejf me mamanë e Allana-s dhe se festa ishte e mbushur me femra. Natyrisht, kjo tregon që futbollisti “playboy” ishte paksa kokëshkretë dhe luajti me zjarrin, por nga ana tjetër versioni i përdhunimit bie poshtë nga të dhënat e fundit.
