Komisioneri evropian për Zgjerim, Johanes Hahn, ka dënuar ashpër deklaratat e kryeministrit Edi Rama dhe presidentit të Kosovës Hashim Thaçit për Shqipërinë e Madhe.
Hahn është shprehur se Rama dhe Thaçi nuk mund të bëjnë presion ndaj Bashkimit Evropian në këtë mënyrë.
“Nëse dikush mendon se deklarata të tilla mund të krijojnë presion mbi BE-në, e kanë gabim”, është shprehur Hahn. Këto deklarime, komisioneri i ka cilësuar si të papranueshme e që nxisin urrejtje dhe përçarje në Ballkan.
“Do të doja të shpreh zhgënjimin tim për shkak të deklaratave nxitëse të disa liderëve në rajon. Mesazhe të tilla mund të shihen si ndërhyrje në punët e brendshme të vendeve fqinje dhe që ndjellin ndryshime të kufijve”, theksoi Johanes Hahn.
Këto deklarata, Johanes Hahn i ka bërë direkt pas takimit me ministrin e Jashtëm të Serbisë, Ivica Daçiç.
