Duket se nuk është vetëm Ronaldo largimi i madh tek Real Madridi. Emri i dytë por që ka finalizuar largimin i pari është trajneri Guti. Legjenda e Real Madridit Guti ka konfirmuar se po largohet nga Bernabeu për t’u bërë asistent i trajnerit të Besiktas.
Spanjolli ka qenë në stafin e trajnerëve që nga viti 2013 tek të rinjtë por ka kërkuar të ndërrojë ambient këtë verë, madje thuhet se do të bëhet trajner i ri i klubit skocez, St Mirren.
Megjithatë, ai ka konfirmuar se hapi i tij i ardhshëm do ta çojë në Turqi. “Sot, dua të falënderoj Real Madridin, shtëpinë time për të gjitha vitet që unë gëzova si futbollist dhe trajner,” konfirmoi ai përmes Instagram.
“Në pak ditë, do ta bëj Besiktas shtëpinë time të re, ku unë do të jem një ndihmës trajner dhe ku mund të vazhdoj të rritem profesionalisht.
Unë jam mirënjohës ndaj Besiktas për dashurinë dhe besimin që më kanë dhënë mua. Do ta kthej tek ju me shumë punë dhe entuziazëm. Familja ime dhe unë presim me padurim këtë aventurë në Stamboll. Le të shkojmë!”
Guti, 41 vjeç, në karrierën e tij si futbollist ka luajtur 24 vite tek Real Madrid dhe ka fituar 5 La Liga dhe 3 Liga Kampionësh. Në të vërtetë e vetmja eksperiencë që ai ka pasur larg Bernabeut ishte një vit tek Besiktas në fund të karrierës së tij, ku ai ndihmoi klubin të fitonte Kupën Turke të 2010-11.
