Pas Messit është Ronaldo ai që do të marrë avionin për në shtëpi. Uruguai me një super Cavani ka eliminuar Portugalinë duke e mposhtur 2-1 në fazën e 1/8-ve të Botërorit të Rusisë. Një ndeshje e luftuar fortë nga portugezët, por që e kanë mjaft të vështirë të depërtosh në mbrojtjen e hekurt uruguaiane.
Ishte Portugalia që e nisi ndeshjen më mirë, por është Cavani që gjen golin në minutën e 7’ pas një kundërsulmi mjaft të mirë të organizuar nga ai me Suarezin. Pas golit uruguaianë kthehen në pikën e tyre më të fortë, në mbrojtje ku luzitanët e kanë mjaft të vështirë të depërtojnë.
Pjesa e dytë fillon njëjtë si e para, por këtë herë është Portugalia që gjen golin e barazimit me Pepe në minutën e 55’. Një krosim në zonë dhe kur e gjithë vëmendja ishte tek Ronaldo është Pepe që godet me kokë dhe e dërgon në rrjetë.
Ky ishte goli i parë i pësuar nga Uruguai në Kupën e Botës. Por barazimi zgjati shumë pak minuta, pasi Edison Cavani godet përsëri, këtë herë me një goditje fantastike teknikisht në hyrje të zonës.
kavani goli i dyte on Vidnews.
Pak më pas ai duhet të dalë jashtë loje pas një dëmtimi që duket se është muskulor. Portugalia sulmon, Uruguai mbron me shumë forca, ky është imazhi i kësaj ndeshjeje, që vazhdon edhe në minutat e fundit.
