Zv/Presidentja e Partisë së Lirisë, Erisa Xhixho akuzon kryeministrin Edi Rama se sulmon SPAK dhe GJKKO në mënyrë që organet e drejtësisë të mos mbërrijnë tek ai. Përmes një deklarate për mediat, Xhixho tha se pas Klotilda Bushkës, që është nën hetim nga SPAK-u, edhe Rektori i Universitetit Bujqësor të Tiranës do të ankohet në Grupin e Deputetëve Socialistë, duke referuar njoftimit të kryeministrit Edi Rama për zhvillimet e nesërme në grupin parlamentar socialist.
Xhixho shtroi dhe dy pyetje lidhur me fjalën që pritet të mbajë rektori i Universitetit Bujqësor të Tiranës para deputetëve të PS.
“Ç’punë ka rektori i një universiteti të ankohet në grupin parlamentar të një partie politike, qoftë kjo edhe partia në pushtet? Pse zgjedh të ankohet vetëm në njërin grup parlamentar dhe jo në grupet e tjera parlamentare? Cili është kriteri i përzgjedhjes?”.
Sipas saj, mbledhja e grupit parlamentar të PS do të shndërrohet në instrument për të sulmuar SPAK dhe GJKKO, pas operacionit në Universitetin Bujqësor ku u bënë disa arrestime për korrupsion me tenderat.
“Precedenti është i rrezikshëm. Tani, gjithsekush ndaj të cilit do të ketë një masë sigurie, e gjeti derën e shpëtimit; mund të ankohet në grupin e deputetëve socialistë”, tha ajo.
Deklarata
Jam në këtë konferencë shtypi për të denoncuar një paralajmërim skandaloz të Kryeministrit, i cili na beri te ditur se Rektori i Universitetit Bujqësor, akademiku Fatbardh Sallaku, ka kërkuar që nesër në ora 09.00 të mëngjesit të dëgjohet në Grupin Parlamentar të Partisë Socialiste lidhur me 24 masa sigurie, dhënë sipas Kryeministrit pa gjyq, për stafin dhe pedagogët e universitetit për disa procedura korruptive.
Pas Klotilda Bushkës, që është nën hetim nga SPAK-u, edhe Rektori i Universitetit Bujqësor të Tiranës do të ankohet në Grupin e Deputetëve Socialistë!
Natyrisht, edhe pse një praktikë e paaplikuar më parë, deri diku e kuptojmë ankimimin e zonjës Bushka, sepse në fund të fundit ankohet në grupin e vet parlamentar.
E kuptojmë ankimimin e zonjës Bushka, por nuk kuptojmë se perse nuk u ndoq i njëjti standard edhe me të tjerët para saj, si për shembull me ish-ministrin Ilir Beqja apo ish-zëvendëskryeministrin Arben Ahmetaj, për të cilët mund të ishin organizuar seanca dëgjimore në grupin e deputetëve socialistë?
Po Rektori i Universitetit Bujqësor përse ka zgjedhur (nëse realisht ka zgjedhur dhe nuk e kanë urdhëruar!) të ankohet në Grupin e Deputetëve Socialistë?!
Të akuzuar për abuzim me tenderat dhe shpërdorim detyre, SPAK ka nisur një hetimin penal dhe ka kërkuar masa sigurie kundër 24 punonjësve të Universitetit Bujqësor të Tiranës.
Ndërkaq, në zbatim të ligjit, GJKKO ( Gjykata e Posaçme Kundër Korrupsionit dhe Krimit të Organizuar) ka vendosur 5 masa arrest me burg, 10 masa arrest shtëpie dhe 9 masa detyrim me paraqitje për të akuzuarit nga SPAK.
Janë disa pyetjet që shtrohen:
1. Ç’punë ka rektori i një universiteti të ankohet në grupin parlamentar të një partie politike, qoftë kjo edhe partia në pushtet?
2. Pse zgjedh të ankohet vetëm në njërin grup parlamentar dhe jo në grupet e tjera parlamentare? Cili është kriteri i përzgjedhjes?
Nëse rektori, që është edhe akademik, edhe profesor-doktor, nuk është dakord me çfarë ka vendosur GJKKO, mund të ankohet ligjërisht në një gjykatë më të lartë, por jo përmes një dëgjese publike në grupin e deputetëve socialistë.
Rektori akademik që është edhe profesor-doktor, duhet ta dijë që masat e sigurisë i vlerëson gjykata dhe jo Kryeministri e as grupi i deputetëve socialistë.
Nëse nuk e ka mësuar kaq gjë, zor se do të mund ta mësojë dot nesër në dëgjesën publike që ai ka kërkuar me grupin e deputetëve socialistë, të cilët janë në hall se kë të dëgjojnë më parë për të arrestuarit nga radhët e tyre.
Gjithsesi, nëse ndodh, e me gjasë do të ndodhë sepse e ka thënë edhe Kryeministri, ankesa përmes një dëgjese publike në grupin e deputetëve socialistë ku Rektori i Universitetit Bujqësor do të ankohet kundër SPAK-ut dhe GJKKO-së, është skandali i radhës i maxhorancës së dëshpëruar prej të arrestuarve nga radhët e veta.
Precedenti është i rrezikshëm. Tani, gjithsekush ndaj të cilit do të ketë një masë sigurie, e gjeti derën e shpëtimit; mund të ankohet në grupin e deputetëve socialistë!
Ajo që ka bërë më parë dhe ajo që do të bëjë nesër Kryeministri duke ndërsyer e duke u ndërsyer kundër SPAK-ut dhe GJKKO-së në grupin e deputetëve socialistë është dëshmia më e qartë e hipokrizisë së tyre kur flasin e na thonë se janë garantët e Reformës në Drejtësi.
E gjitha është në vazhdën e sulmeve dhe shantazheve për të mos lejuar SPAK-un të mbërrijë të vetë Kryeministri!
Masat e SPAK për drejtuesit e Universitetit Bujqësor të Tiranës
Nën dyshimet për abuzime me tenderat, Gjykata e Posaçme me kërkesë të SPAK firmosi 22 masa sigurie për dy zëvendës rektorët e Universitetit Bujqësor të Tiranës, dy pedagogë dhe staf administrativ. Ndaj Ilir Kapaj, zëvendës rektor për mësimin dhe Romina Koto zëvendës rektore për marrëdhëniet me institucionet dhe publikun dhe shtatë persona të tjerë, është caktuar masa e detyrimit për paraqitje. Kapaj është është bashkëshorti i zëvendës ministres së Arsimit Ana Kapaj.
Pesë të dyshuar janë dërguar nën masën e arrestit me burg, ndërsa 10 të tjerë, përfshirë dhe dy pedagodët Dritan Lacci dhe Ilir Kusi, po mbahen nën masën e arrestit në shtëpi.
Arrest me burg:
Edmond Tërthorja,
Amarildo Lleshi,
Mehmet Qoshja,
Altin Murto,
Piro Zoga,
Arrest shtëpi:
Agim Sefa,
Arjan Buliqi,
Serafin Skënderi,
Ilir Kusi,
Dritan Laçi,
Azem Parllaku,
Artur Koleci,
Radion Dhromi,
Blenard Spaho,
Tedi Proda,
Detyrim paraqitje:
Enkeleida Sallaku,
Klara Jahollari,
Ilir Kapaj,
Erjola Kopali,
Klea Lekocaj
Romina Koto
Bejo Bizhga,
Etleva Shore,
Rezearta Dervishi
