Partizani i ka dhënë fund ëndrrës për titullin kampion pas barazimit me Egnatian, që i kaloi rrogozhinasit në finalen e Superiores. Megjithatë, skuadra e kuqe ka marrë një lajm pozitiv: kualifikimin e sigurt për në Ligën e Konferencës për sezonin e ardhshëm.
Kryeqytetasit do të jenë të vendosur në vazon e skuadrave të forta në turin e parë të këtij kompeticioni europian, falë koeficientit të lartë 6,5 në renditjen e UEFA-s. Ky pozicion u jep atyre një avantazh të rëndësishëm në short, duke rritur gjasat për të kaluar ture dhe për të siguruar përfitime financiare për klubin.
Në krahun tjetër, Dinamo e Tiranës – edhe ajo pjesëmarrëse në Ligën e Konferencës – do ta nisë rrugëtimin europian nga vazoja e skuadrave të dobëta. Me një koeficient prej vetëm 1,575, blutë do të përballen me kundërshtarë më të fortë që në nisje, për shkak të mungesës shumëvjeçare në garat e UEFA-s.
