Analisti Mentor Kikia ka kritikuar partitë tradicionale në Shqipëri, duke argumentuar se ato nuk bëjnë përpjekje për të krijuar institucione të mirëfillta votimi dhe vuajnë nga mungesa e demokracisë së brendshme. Sipas tij, strukturat partiake janë kthyer në “klube miqsh” apo “biznese private”, ku kryetarët veprojnë si drejtues ekzekutivë.
“Partitë e vjetra nuk janë të kalcifikuara vetëm për shkak të moshës së drejtuesve, por edhe për shkak të mungesës së demokracisë së brendshme. Strukturat e tyre janë të mbyllura dhe nuk promovojnë përfshirjen përmes votës. Edhe kur përpiqen të ndërtojnë institucione votimi, këto mbeten të padobishme,” tha Kikia.
Nga ana tjetër, ai komentoi edhe partitë e reja, duke theksuar se disa prej tyre nuk kanë një profil të qartë. Sipas tij, Lëvizja Bashkë e Arlind Qorit ka një pozicionim të qartë majtas, ndërsa Agron Shehaj përfaqëson shtresën e biznesit si një alternativë e djathtë. Megjithatë, ai vlerësoi se iniciativa si “Shqipëria Bëhet” dhe “Nisma” mbeten të paqarta dhe të vendosura në një hapësirë të mesme politike.
Kikia gjithashtu ngriti shqetësimin se shumë parti të reja rrezikojnë të kthehen në “vegla” të partive të vjetra. Ai tha se shpeshherë kryetarët e këtyre partive përfitojnë nga pozita e tyre dhe më pas largohen nga skena politike, duke bërë që këto parti të mos arrijnë të krijojnë një strukturë kolegjiale të qëndrueshme.
