Kryetari i Partisë Demokratike, Sali Berisha, ka reaguar në një intervistë televizive për herë të parë lidhur me krijimin e partive të reja politike, duke përmendur emrin e Agron Shehajt, njërit nga ish-anëtarët e PD-së që më pas u largua dhe themeloi një parti të tijën.
Berisha akuzoi Shehajn për shkeljen e një kodi moral të rëndë, duke thënë se ai kishte marrë database-in e Partisë Demokratike pa lejen e duhur, një veprim që ai e cilësoi si “pabesi të plotë”. Berisha e konsideroi këtë veprim të papranueshëm dhe të dëmshëm për reputacionin e Shehajt, duke e akuzuar për përdorimin e të dhënave të PD-së për të dërguar mesazhe për interesat e tij politike.
Në intervistë, Berisha shpjegoi se ai kishte qenë ai që i kishte dhënë Shehajt mundësinë për të përdorur database-in e PD-së, por tani ai e shfrytëzonte atë për qëllime të tij, një veprim që, sipas Berishës, shkelte çdo kod moral dhe profesional. Ai theksoi se për të krijuar një parti të suksesshme, duhet punuar me angazhim dhe përpjekje të sinqerta, dhe jo duke përdorur mjetet e një partie tjetër.
Berisha e mbylli pjesën e intervistës duke theksuar se Shehaj dhe të tjerë që kishin lënë PD-në për të krijuar parti të reja, nuk kishin sjellë asgjë të re dhe vetëm po e shfrytëzonin Partinë Demokratike për qëllime personale.
Pjesë nga fjala e Berishës:
Agron Shehaj është opozitë e opozitës. Ai kishte një vend dhe ishte i respektuar në Partinë Demokratike. Agron Shehaj papritmas, do iki më tha mua. Mirë i thashë unë, se unë respektoj çdo mendim, por i thashë Agron vend më të përshtatshëm për ardhmërinë tënde politike nuk do gjesh.
Ai shkoi, krijoi parti, tani Shehaj shkel kodin më të rëndë moral. Agron Shehaj ka marrë database-n në pabesi të plotë për të mos thënë dhe më shumë të Partisë Demokratike, të cilin unë kam qenë shkak që ia kam dhënë se nuk mund t’i mbaja rezervë dhe tani shfrytëzon këtë database jashtë çdo kodi moral. Mund të tregoj përgjigje që i tregojnë demokratët atij që s’mund ta bëjë kurrë.
Ka një kod moral. Këto që paraqiten të reja dhe që ikën nga PD-ja, sigurisht që shqiptarët presin risi. Çfarë sjell ky? Ky përdor database e PD-së, për të çuar mesazhe, jashtëzakonisht e dobët. Ti partinë tënde do ta krijosh me punën tënde si duhet.
