Në një vendim të rëndësishëm për skenën politike shqiptare, Partia e Unitetit Kombëtar (PUK) ka njoftuar tërheqjen nga zgjedhjet parlamentare të 11 majit 2025, duke shpallur një mbështetje të hapur për Partinë Socialiste të Shqipërisë. Në një deklaratë zyrtare, PUK argumenton se ky vendim vjen si një akt strategjik për të maksimalizuar votën kundër opozitës së drejtuar nga Sali Berisha dhe për të forcuar alternativën qeverisëse aktuale, të cilën e cilëson si promotore të reformave dhe integrimit europian.
Kryetari i PUK, Av. Idajet Beqiri, u ka bërë thirrje strukturave dhe mbështetësve të partisë që në 11 maj të votojnë për Partinë Socialiste, duke theksuar rëndësinë e këtyre zgjedhjeve për të ardhmen e vendit.
D E K L A R A T Ë
E PARTISË SË UNITETIT KOMBËTAR
PUK, e regjistruar si subjekt zgjedhor me Vendimin e KQZ nr. 161, datë 25.02.2025 për zgjedhjet e Kuvendit të Shqipërisë të datës 11 maj 2025, e ndërgjegjshme dhe e përgjegjshme se këto zgjedhje kanë rëndësi historike për vendin tonë, posaçërisht për t’i mbyllur përfundimisht derën alternativës antishqiptare dhe vrastare të Sali Berishës dhe bandës së tij, por edhe për shkak të kufizimeve dhe që u bëhet partive të vogla nga Kodi Zgjedhor, vendosi të jap ndimesën e saj produktive në maksimalizimin e votës për alternativën aktuale qeverisëse, Partinë Socialiste të Shqipërisë.
Alternativa aktuale qeverisëse, ka qënë dhe ka mbetur promotore e reformës në drejtësi, forca determinante progresive e transformimit të vendit dhe e anëtarësimit të Shqipërisë në BE.|
Për sa theksuam vendosëm që sot në datën 11 mars 2025, që është edhe dita e fundit sipas Kodit Zgjedhor, të mos paraqesim kandidatë për deputetë në zgjedhjet e 11 majit 2025 duke u tërhequr kështu nga kjo garë elektorale.
U bëjmë thirrje gjithë strukturave tona të PUK, të zgjedhurve në pushtetin vendor nga Partia jonë, anëtarëve dhe elektoratit të PUK, që votën e tyre t’a japin në 11 maj 2025 për Partinë Socialiste të Shqipërisë.
Për Partinë e Unitetit Kombëtar të Shqipërisë
K R Y E T A R I
Av. Idajet Beqiri
Tiranë, më 11 mars 2025
