Partia e Lirisë reagoi sot lidhur me situatën e arsimit në vend, ndërsa u shpreh se “çdo vit numri i nxënësve në shkolla bie ndjeshëm”.
Përmes një deklarate për shtyp, Sekretarja për Marrëdhëniet me Publikun në Partinë e Lirisë, Arla Merja reagoi ndaj deklaratës së ministres së Arsimit dhe Sportit, Ogerta Manastirliu për pajisjen e shkollave me “kabinete inteligjentë”.
“Në vend që të fokusohet te përmirësimi rrënjësor i cilësisë së mësimdhënies, te rritja e meritokracisë apo te investimi serioz në formimin profesional të të rinjve, Ministrja e Arsimit ka zgjedhur sërish rrugën më të lehtë, propagandën. Dhe këtë herë, ajo na flet për “kabinete inteligjente”. A thua se teknologjia mund të fshijë mungesën e librave, mungesën e mësuesve të përgatitur dhe zbrazjen dramatike të bankave të shkollës”, tha Merja.
Sipas saj, në sistemin arsimor shqiptar nuk janë zgjidhur ende problemet më elementare.
“Si mund të flasim për teknologji të avancuar, kur shumë shkolla në Shqipëri nuk kanë as tualete funksionale, as ngrohje gjatë dimrit, as ujë të rrjedhshëm apo libra të mjaftueshëm për nxënësit? A nuk është cinike që flasim për laboratorë virtualë, kur mësuesit vetë shpesh nuk marrin trajnime reale dhe paguhen nën nivelin minimal të dinjitetit?”, shtoi ajo.
Merja tha se “arsimi ynë nuk ka nevojë për makijazh, por ka nevojë për ndërhyrje serioze, për reforma të thella, për një riorientim të plotë të prioriteteve”.
“Duhet të investohet te mësuesi, te nxënësi dhe te përmbajtja e dijes, jo te fasadat dixhitale pa thelb që i shërbejnë vetëm propagandës politike. Prandaj, në vend të shfaqjeve me “kabinete inteligjente”, i bëjmë thirrje Ministres së Arsimit dhe gjithë qeverisë, zbrisni në tokë. Shkoni në shkolla, jo për kamera, por për të parë realitetin. Flisni me nxënësit, dëgjoni mësuesit, dhe sillni politika që nisin nga nevojat reale, jo nga ambiciet për tituj lajmesh boshe”, shtoi ajo.
