Drejtoresha e Komitetit Shqiptar të Helsinkit, Erinda Skëndaj ka bërë të ditur disa nga parregullsitë e pikasura nga institucioni që ajo drejton në zgjedhjet e pjesshme vendore në Himarë.
Në një intervistë televizive, Skëndaj theksoi se në procesin e votimit në Himarë pati disa problematika duke nisur në rastet e mosidentifikimit të personave, karta e të cilave kishte skaduar.
“Në vlerësimin tonë ku u shfaqën disa problematika si në mosidentifikimin e personave, karta e të cilave kishte skaduar.
Kishte raste kur PEI nuk e bëri këtë identifikim dhe vjen logjika e funksionimit të PEI që ofron garanci 100 për qind si çdo pajisje elektronike.
Në këtë kontekst çdo procedurë ligjore që parashikohet në Kodin Zgjedhor për sa i takon verifikimit dhe nënshkrimit nga zgjedhësit, në vlerësimin e Komitetit Shqiptar të Helsinkit është e detyrueshme për t’u respektuar”, u shpreh Skëndaj.
Sipas drejtoreshës së Komitetit Shqiptar të Helsinkit një element tjetër ishte edhe rasti me ata zgjedhës që nuk gjenin emrat në listë.
Ajo shpjegoi se në zgjedhjet në Shqipëri ende vijohet me praktikën e orientimit të zgjedhësve nga vëzhguesit partiakë duke rritur presionin ndaj tyre në procesin e votimit.
“Ne vijojmë të shikojmë praktikën e orientimit nga vëzhguesit partiakë të këtyre shtetasve, të cilët kishin ose listat e printuara.
Pra, vëzhguesit partiakë dinë elektoratin që do të votojë për ta, pra njohin se në cilin kah do të votojë ky elektorat dhe ndihma që u jepej ishte ose përmes listave të printuara ku identifikohej qendra e votimit ku ishin zgjedhësit që e lënë në ditën e fundit se në cilën qendër votimi janë, ose përmes aplikacioneve të veçanta, gjë në vlerësimin tonë nuk është një praktikë e rregullt”, nënvizoi Skëndaj.
Skëndaj shtoi se praktika e dhënies së numrave rendor të zgjedhësve nga komisionerët është qasje e gabuar pasi kjo sjell edhe direkt indentifikimin e gjeneraliteteve të zgjedhësve duke rritur intimidimin ndaj tyre.
“Edhe praktika e dhënies së numrave rendor të zgjedhësve nga komisionerët që janë partiakë drejt vëzhguesve që përfaqësojnë njërin kah ose tjetër politik, është e gabuar sepse përmes numrave rendorë bëhet identifikimi i gjeneraliteteve të zgjedhësve.
Nëpërmjet identifikimit të zgjedhësve, vëzhguesit dhe partitë politike kanë mundësi të ushtrojnë presion tek ajo pjesë e elektoratit që ka premtuar se do të votojë për ta duke i kërkuar të paraqiten në qendrën e votimit përfshirë edhe familjarët e tyre.
Pak a shumë këto ishin në terma të përgjithshëm parregullsitë në procesin e votimit ashtu sikurse mungesa e njohurive dhe e trajnimit të komisionerëve u reflektua edhe në fazën e përmbylljes së procesit të votimit”, shpjegoi Skëndaj.
