Në seancën e sotme të Kuvendit, ish-kryeministri Sali Berisha e cilësoi legjislaturën aktuale si “parlamenti i narko-diktaturës”, duke akuzuar mazhorancën për dështime dhe politika kundër interesave të qytetarëve.
“Kjo është seanca de facto e fundit e këtij Parlamenti, i cili në katër vite u rreshtua kundër qytetarëve shqiptarë, kundër interesave të tyre dhe parimeve demokratike. Do të hyni në histori si parlamenti më i zi,” deklaroi Berisha.
Ai kritikoi rritjen e pagave për deputetët dhe zyrtarët e lartë, ndërsa sipas tij, pensionistët u lanë me një ndihmë minimale. “Për herë të parë në 34 vite, ju shumëfishuat rrogat tuaja dhe të zyrtarëve, ndërsa për pensionistët dhatë një shumë qesharake prej 16 milionë eurosh për 800 mijë pensionistë,” theksoi ai.
Sipas Berishës, qeveria ka ndjekur politika që kanë detyruar qytetarët të largohen nga Shqipëria, duke e akuzuar mazhorancën si përgjegjëse për krizën ekonomike dhe emigracionin masiv.
Berisha: Kjo është seanca defacto e fundit e këtij Parlamenti i cili në 4 vite u rreshtua kundra qytetarëve shqiptarë, kundër interesave të shqiptarëve, kundër parimeve demokratike të një vendi të lirë dhe do përfundojë në histori si parlamenti i narko-diktaturës. Do hyni në histori si parlamenti më i zi. Për herë të parë në historinë 34-vjeçare ju votuat në dhjetëra ligje vendimet në të cilat shumëfishuat rrogat tuaja dhe rrogat e zyrtarëve dhe kur erdhi puna tek pensionet ju latë një shumë qesharake 16 milion për 800 mijë pensionistë. Ju u bëtë strumbullarët themelorë i politikave të përzënies së shqiptarëve nga Shqipëria.
