I njohur për nga vlerat turistike, Parku Kombëtar në Qafë Shtamë do të shquhet ndër vendet më të preferuara në vendin tonë. Pushuesit të ardhur thuajse nga tërë vendi do të shijojnë freskinë e natyrës së bukur të bjeshkëve përkundrejt temperaturave të larta. Uji i ftohtë i burimeve, pishat e larta qindravjeçare të ruajtura me vullnetin e banorëve të zonës gjatë viteve të tranzicionit do të shtojnë dhe më shumë kënaqësinë e pushuesve. Qafë Shtama tashmë është e njohur për vlerat kurative të ujit nga burimet përreth si dhe Krojn e quajtur Nëna Mbretëreshë si dhe ajrin e pastër që ka ofruar dhe për persona që vuajnë nga sëmundjet kronike si te asmës etj.
Udhëtimi nga Kruja do të zgjaste përreth 60 minuta në 25 km, rrugë e asfaltuar pak vite më parë, e cila gjarpëron në tërë gjatësinë e saj, madje drejtuesit të mjetit i duhet shumë vëmendje nga rreziku që shfaq ajo, ndërsa nga krahu tjetër duket qartë liqeni i Bovillës, ndërsa malet që rrethojnë zonën kanë hijeshinë e bukur natyrore.
Investimi më i rëndësishëm gjatë 25 viteve i përket asfaltimit të rrugës, e cila në stinën e dimrit hera-herës izolohet nga reshjet e dëborës. Për t’i ardhur në ndihmë komunitetit të malësisë së Krujës, në gatishmëri vihen fadromat e kompanisë së fabrikës së ujit që ndodhet në afërsi të Parkut Kombëtar.
Teksa një grup vizitorësh, kanë preferuar një nga lokalet, Teuta Loka me profesion mësuese tregon për vlerat e këtij destinacioni turistik. Ajo më së shumti tregon dhe për pyjet, një merak i saj, pasi i ati i saj Muharrem Loka prej 40 vitesh ka punuar si specialist në zonën e Krujës.
Në pikun e sezonit turistik pushuesit janë të shumtë rreth Parkut Kombëtar në Qafë Shtamë, një ndër destinacionet turistike më të njohura në vendin tonë, nga natyra e mrekullueshme, por dhe nga servirja e gatimeve tradicionale, produkteve të fshatrave nga kjo zonë. Ende është funksional hoteli i ndërtuar afro rreth 50 vite më parë që shfrytëzohej asokohe si Kampi i punëtorëve, ndërsa janë të domosdoshme investimet në përmirësimin e kushteve në tërësi në këtë zonë. Uji i pijshëm akull i ftohtë nga burimet e shumta përreth kësaj zone, është një nga elementet që ndikon në shëndetin ndërsa banorët vendas të thonë se “nga ky ujë nuk ngopesh kurrë”.
Në vitin e mbrapshtë 1997, banorët e fshatrave kanë rezistuar të mbrojnë pyjet dhe sidomos pishat shumëvjeçare, disa individë kërkonin të zhduknin kurorën e madhe të pishave qindra hektarëshe, kjo pasuri kombëtare me shumë vlera. Pishat kanë lartësi të konsiderueshme dhe ndikojnë pozitivisht në ajrin e pastër që ndërthuren me erërat kontinentale duke krijuar freskinë e preferuar në stinën e ngrohtë të verës të shëndetshme për pushuesit.
Organet qeveritare duhet të përqendrohen tek kjo zonë turistike e Parkut Kombëtar në Qafë Shtamë, ndonëse këmba e ndonjërit prej tyre e ka shkelur këtë zonë madje nuk janë larguar pa konsumuar drekën e shijshme tradicionale, ndërsa janë larguar për të harruar këtë mrekulli të natyrës së bukur shqiptare./ Nga Ahmet Zani
