Dalin detaje të reja lidhur me zhdukjen e futbollistit Emiliano Sala. Ky i fundit ka pasur parandjenja para zhdukjes së avionit, gjë që zbulohet në mesazhin që u ka dërguar miqve të tij.
Futbollisti i porsatransferuar i Cardiff Cityt kishte shkruar në një grup në WhatsApp, ku ishin edhe miqtë e tij:
“Përshëndetje vëllezër të vegjël, si jeni njerëz të krisur? Jam vërtet i lodhur, isha këtu në Nantes duke bërë gjëra, gjëra, gjëra dhe gjëra, dhe nuk po ndalen kurrë, nuk ndalen, nuk ndalen”.
“Jam në një aeroplan që duket se po shkatërrohet dhe po shkoj në Cardiff, çmenduri, nesër veç fillojmë, kurse pasdite nisim stërvitjen, djema, në ekipin tim të ri”, ka thënë fillimisht ai.
Ndërsa më pas, siç transmeton Daily Mail, Sala ka thënë: “Si jeni njerëz, krejt mirë? Nëse nuk merrni ndonjë lajm nga unë brenda një ore e gjysmë, nuk e di nëse duhet ta dërgoni dikë të më gjejë… Sa shumë kam frikë!”.
Edhe mikut të tij që e kishte dërguar në aeroport, mbrojtësit Nantes Nicolas Pallois, lojtari i kishte thënë para nisjes së kishte frikë nga ai udhëtim. Me të njëjtin aeroplan, sulmuesi kishte udhëtuar nga Cardiffi në Francë të dielën dhe ishte ankuar për pasiguri.
Aeroplani në të cilin ndodhej Sala u zhduk mbi Kanalin Anglez (La Manche) të hënën mbrëma. Dyshohet se ai ka humbur jetën, pasi aeroplani ka dalë nga radari në veri të Alderney në Les Casquets, rreth orës 20:23 të të hënës, vetëm një orë pas nisjes nga aeroporti Atlantique i Nantes. Aeroplani i vogël Piper PA-46 Malibu ishte nisur për në Cardiff, ku duhej të vazhdonte karriera e sulmuesit argjentinas.
Porsa kishte hipur në aeroplan për t’u kthyer në Angli, futbollisti u kishte shkruar shokëve të tij se aeroplani bënte zhurma të çuditshme. Policia e Guernseyt i ka gjetur disa objekte që lundronin mbi ujë, mirëpo nuk ka arritur të konfirmojë nëse kanë qenë nga ai aeroplan.
