Presidenti rus Vladimir Putin e ka informuar udhëheqësin kinez Xi Jinping mbi bisedimet e tij të fundit me të dërguarin special të SHBA-së Steve Witkoff lidhur me konfliktin në Ukrainë përpara një samiti të mundshëm SHBA-Rusi, raportuan mediat kineze të premten, duke cituar zyrën e Xi.
Sipas njoftimeve, telefonata trajtoi marrëdhëniet dypalëshe dhe sfidat globale. Putin tha se Moska vlerëson rolin konstruktiv të Kinës në zgjidhjen e krizës së Ukrainës dhe është e gatshme të ruajë një koordinim të ngushtë me Pekinin.
Xi përshëndeti kontaktet midis Rusisë dhe SHBA-së, shprehu mbështetje për përmirësimin e marrëdhënieve dhe mbështeti një zgjidhje politike afatgjatë për konfliktin e Moskës me Kievin. “Nuk ka zgjidhje të thjeshta për çështje komplekse”, u citua të ketë thënë Xi, duke u zotuar se Kina do të vazhdojë të promovojë dialogun për të zgjidhur konfliktet rajonale.
Të dy udhëheqësit shprehën vlerësim për partneritetin strategjik midis kombeve të tyre.
“Udhëheqësit e të dy vendeve vlerësuan lart nivelin e lartë të besimit politik dhe bashkëveprimit strategjik… dhe ranë dakord unanimisht për të çuar përpara së bashku marrëdhëniet… drejt një zhvillimi më të madh “, tha zyra e Xi-së.
Kremlini konfirmoi telefonatën dhe tha se të dy udhëheqësit diskutuan gjithashtu vizitën e ardhshme të Putinit në Kinë.
Detajet e takimit gati tre-orësh të Putinit me Witkoff të mërkurën nuk u zbuluan. Ndihmësi i Kremlinit, Yury Ushakov, tha më parë se të dyja palët kishin “shkëmbyer sinjale” mbi Ukrainën dhe kishin diskutuar lidhjet Rusi-SHBA dhe bashkëpunimin e mundshëm strategjik. Shtëpia e Bardhë tha se takimi “shkoi më mirë se sa pritej”, ndërsa Presidenti i SHBA-së Donald Trump vuri në dukje se “u bë përparim i madh”, megjithëse nuk u dhanë detaje specifike.
