Papa Françesku, gjatë vizitës së tij dyditore në Egjipt, u ka bërë thirrje udhëheqësve myslimanë të vendit që të bashkohen në refuzimin e ekstremizmit të dhunshëm, në një kohë kur militantët e shtetit islamikë po shënjestrojnë komunitetet e krishtera anembanë Lindjes së Mesme.
Udhëtimi dyditorë i Atit të Shenjtë në Egjipt, që ka për synim të përmirësojë marrëdhëniet kristiano-myslimane, vjen vetëm 3 javë pasi kamikazë të Shtetit Islamik vranë të paktën 45 persona në dy kisha egjiptiane.
Papa është shprehur vazhdimisht se dialogu mes të krishterëve dhe myslimanëve është e vetmja rrugë për të mposhtur militantët islamikë, të cilët kanë persekutuar të krishterët dhe i kanë detyruar të largohen nga komunitetet e tyre 2.000-vjeçare në Irak dhe Siri, ndërsa tashmë po i godasin edhe në Egjipt.
