Humbja turpëruese ndaj Kosovës akoma nuk është harruar në kampin kuqezi. Trajneri Panucci është duke studiuar skema të reja dhe lojtarë të rinj për të parë elementet e duhura tek ta dhe ti grumbullojë në ndeshjet e Ligës së Kombeve. Para është ndeshja me Ukrainën dhe kuqezinjtë e shohin si momentin më të mirë për të reaguar me një fitore.
Dyndja e lojtarëve të rinj duket se ka dështuar totalisht dhe Panucci pak nga pak po i rikthehet skemës së vjetër dhe lojtarëve me eksperiencë. Ditën e sotme italiani ka provuar një skemë të re ku me fanellën e titullarëve janë parë shumë ndryshime. Në portë do të konfirmohet Berisha, me Hysajn në të djathtë dhe Veselin në të majtë si karta e fundit për të zëvendësuar të padëshiruarin Agolli. Ndërsa në qendër pritet të rikthehet Mavraj dhe Gjimshiti.
Përpara mbrojtjes e nis nga fillimi Sabien Lilaj, që shihet si ekuilibrist mes reparteve. Roshi do të luajë si një mesfushor i pastër në të djathtë, në qendër do jenë Ndoji dhe Ramadani, ndërsa duket i rikuperuar Lenjani, që do të nisë si mesfushor i majtë. Për të plotësuar rreshtimin 4-1-4-1, në majën e sulmit mendohet që të nisë ndeshjen Manaj. Këtë rreshtim, Panucci e ka praktikuar pasditen e së premtes, pak minuta pasi u konfirmua që ndeshja do të luhet në stadiumin e Evianit.
Kombëtarja ka nevojë të testohet dhe këtë e kërkon më shume Panucci, që kërkon të jetë i qartë për futbollistët dhe skuadrën që do të ketë në dispozicion për fushën e re kualifikuese. Formacioni i mundshëm 4-1-4-1: Berisha; Hysaj, Gjimshiti, Mavraj, Veseli; Lilaj përpara mbrojtjes; Roshi, Ramadani, Ndoji, Lenjani; dhe Manaj i vetëm në sulm.
