Kreu i Këshillit Kombëtar në Luginën e Preshevës, Ragmi Mustafa ka shprehur pakënaqësinë e tij lidhur me marrëveshjen e sotme nënshkruar mes qeverisë së Kosovës dhe asaj të Shqipërisë.
Marrëveshja që përmban pika mjaft të rëndësishme për dy popujt, duket se ka lënë jashtë pikërisht Luginën e Preshevës. Kjo ka sjellë reagimin e Mustafës, i cili shkruan se përderisa Lugina e Preshevës vazhdon të diskriminohet në të gjitha fushat nga Serbia, mbështetja e sotme e Prishtinës dhe Tiranës është jetike për shqiptarët në Serbi.
“I zhgënjyer që qeveritë e Shqipërisë dhe Kosovës nuk përfshinë asgjë për Luginën e Preshevës, në marrëveshjen e sotme të firmosur midis tyre, në mbledhjen e përbashkët të Pejës”, shkruan ndër të tjera Mustafa në llogarinë e tij në Facebook.
Reagimi i plotë:
I zhgënjyer që qeveritë e Shqipërisë dhe Kosovës nuk përfshinë asgjë për Luginën e Preshevës, në marrëveshjen e sotme të firmosur midis tyre, në mbledhjen e përbashkët të Pejës.
“Fondi i përbashkët për Luginën e Preshevës” i themeluar nga dy qeveritë e atëhershme në Prizren më 2014 ishte një vendim inkurajues.
Përderisa Lugina e Preshevës vazhdon të diskriminohet në të gjitha fushat nga Qeveria e Republikës së Serbisë, mbështetja e sotme e Prishtinës dhe Tiranës zyrtare është edhe më jetike se dje, për shqiptarët në Serbi.
Qeverisja e re e Këshillit Kombëtar Shqiptar do të angazhohet për thellimin e komunikimit dhe të bashkëpunimit me kabinetet qeveritare të Shqipërisë dhe Kosovës.
Modeli i bashkërendimit dhe bashkëveprimit të Këshillave Kombëtare Hungareze dhe Kroate me Budapestin dhe Zagrebin zyrtar, janë një shembull i mirë që mund të na shërbejë edhe neve në të ardhmen.