Pasi paralajmëroi betejë pa kthim dhe kërkoi nga të vetët të përshtaten me vendimet e marra, Sali Berisha dhe Kryesia e Partisë Demokratike vendosi riorganizimin e kësaj force politike përmes ndarjes në 4 rajone që do të drejtohen nga 4 koordinatorë.
Në mbledhjen me dyer të mbyllura për mediat të së enjtes, u vendos që pjesë e këtij riorganizimi të jenë edhe deputetët e grupit parlamentar të drejtuar nga Gazment Bardhi, të cilët janë ftuar të bëhen pjesë e këtij procesi.
Të gjitha vendimet e marra në Kryesi do të diskutohen edhe me anëtarët e Këshillit Kombëtar që do të mblidhet sot në orën 12:00.
E ndërsa pritet që Këshilli të nisë punimet mësohet se aleati që iu bashkua kohët e fundit, Gazment Bardhi dhe grupi i deputetëve të tij e kanë braktisur këtë mbledhje, pa dhënë asnjë shpjegim.
Sa i perket vendimeve, krahas riorganizimit, opozita do të vijojë edhe tubimet në sheshe me qytetarët.
Në 27 Dhjetor demokratët kanë thirrur qytetarët të protestojnë në orën 09:00 jashtë Gjykatës së Lartë, teksa togat e zeza mblidhen për të shqyertuar rekursin e bërë nga deputetët që mbështesin ish-kryeministrin Berisha lidhur me fatin e logos së Partisë Demokratike.
