Një incident i rëndë ka ndodhur në repartin e hemodializës në Korçë, ku 65-vjeçari Kujtim Mero ka kërcënuar stafin mjekësor me një shishe benzinë. Ngjarja ka ndodhur kur pacientit, i cili prej 7 vitesh merr trajtim për insuficiencë renale, iu kërkua të ndërronte vendin për dializë për shkak të një defekti teknik në pajisjet mjekësore. Ai ka refuzuar dhe më pas ka nxjerrë një shishe me benzinë, duke krijuar panik te pacientët dhe stafi.
Mjekja psikiatre Nikolina Bode ka sqaruar se Mero nuk është i kartelizuar si pacient me probleme të shëndetit mendor, megjithëse ka shfaqur sjellje agresive dhe kundërshtuese. Sipas saj, që prej korrikut 2024, ekipi i shëndetit mendor ka tentuar disa herë ta konsultojë, por ai ka refuzuar çdo trajtim. Edhe familjarët e tij kanë kundërshtuar ndërhyrjen e mjekëve për ndihmë psikiatrike.
Policia ndërhyri menjëherë dhe arriti të neutralizojë 65-vjeçarin përpara se të ndodhte një incident më i rëndë. Ai po hetohet në gjendje të lirë, pasi është i varur nga trajtimi i dializës. Ndërkohë, policia ka sekuestruar kamerat e sigurisë për të analizuar ngjarjen dhe për të përcaktuar masat e mëtejshme.
