Ai është ‘heroi’ i Uruguait, njeriu me paterica që i drejtoi me sukses në Botërorin e Rusisë. Por Oscar Tabarez rezulton se është edhe mjeshtri i modestisë. Ai ka refuzuar propozimin e bërë nga Bashkia e Montevideos, për vendosjen e një statuje të teknikut 71-vjeçar në qendër të qytetit, pikërisht për të nderuar atë.
Tabarez është një rekordmen absolut për sa i përket drejtimit të një kombëtareje të vetme, pasi është i vetmi trajner që ka qenë në stolin e Uruguait në 4 edicione të Kupës së Botës; në vitin 1990, atë 2010, vitin 2014 dhe atë 2018.
Tani, ai është gati të vendosë rekorde të reja, por pa nderime speciale, siç është rasti i ngritjes së statujës së tij në qendër të kryeqytetit uruguaian.
Janë vet drejtuesit e Bashkisë së Montevideos që kanë konfirmuar gjithçka, duke shpjeguar edhe arsyen e refuzimit të Tabarezit në lidhje me këtë çështje. Sipas tyre, Tabarez e refuzoi ngritjen e statujës, pasi do të shkatërronte frymën e bashkimit, të cilën po kërkon që ta krijojë dhe inkurajojë te përfaqësuesja uruguaiane.
