Përcaktimi i orareve fikse kur në zonat turistike do të lejohet muzika e lartë nuk ka kaluar ende për votim në parlament.
Në Komisionin e Ekonomisë u sqarua se do të jenë bashkitë që do të përcaktojnë hartën ku kufizohen zhurmat e larta, ndërsa policia e shtetit do të ketë detyrimin ta zbatojë.
“Bashkia të ketë përcaktuar ku do të jenë këto zona ku muzika në nivelin kufi lejohet deri në orën 24:00. Ndërhyrjet e policisë së shtetit sa herë, bëhet fjalë për prishje dhe cënim të qetësisë publike,” tha ajo.
Në përcaktimet e reja, u saktësua që pushteti vendor do të ketë detyrim të ruajë qetësinë në biznese të tjera qoftë dhe të funksionimit të furrave të bukës.
“Bashkitë janë përgjegjëse për marrjen e masave për mbrojtjen e shëndetit dhe mjedisit nga veprimtaritë ekonomike apo sociale që lëshojnë zhurma brenda juridiksionit të saj, që do të thotë e çdo veprimtarie që gjeneron zhurë qofshin këto furra buke, lavazh, çdo gjë që gjeneron zhurmë e cila brenda territorit të saj menaxhohet nga bashkitë,” tha ajo.
Gjatë debateve opozita kërkoi uljen e nivelit të gjobave për të mos ndikuar në funksionimin e bizneseve.
