Pritshmëritë në fillim të sezonit ishin mjaft të larta për të dy ekipet dhe përballja Partizani-Skënderbeu do të ishte vendimtare për titullin. Por pasi është mbyllur faza e parë e kampionatit vetëm korçarët i kanë arritur pritshmëritë duke blinduar vendin e parë dhe duke bërë paraqitje fantastike. Nga ana tjetër Partizani ka shfaqur shumë dobësi dhe ka zhvilluar një kampionat për tu harruar këtë fillim sezoni me drejtuesit italianë. Rikthimi i Starovës duket si shpresa e fundit dhe përballja e sotme mes këtyre dy klubeve do të jetë shansi i fundit për të kuqtë që të shpresojnë për titullin edhe pse duket i pamundur.
Partizani vjen me një trajnerë të ri në dy ndeshjet e fundit dhe ka arritur të rikthehet tek fitorja në një stadium të vështirë, me kampionët në fuqi të Superiores, Kukësin. Ndërsa ekipi i Ilir Dajës vjen nga dy barazime në kampionat përballë Flamurtarit dhe Kamzës, por që ka marrë një fitore mjaft të rëndësishme në “Elbasan Arena” përballë gjigantëve të Dinamos së Kievit në Europa League. Kjo fitore i sjell bardhekuqtë përballë Partizanin me një moral të lartë dhe më të qartë për aftësitë që kanë dhe atë çfarë ata mund të japin në fushë.
Ndeshja e fundit e zhvilluar në Korçë është fituar nga Skënderbeu me rezultatin 2-0, me gola të Soue dhe 11-metërshit të Lilajt. Statistikat në këto vitet e fundit janë thuajse në baraspeshë totale, por në këto 4 sezone, bardhekuqtë mund të krenohen me titujt e fituar por edhe me faktin se i kanë shënuar më shumë gola Partizanit 19 kundrejt 13 të të kuqve. Përsa i përket totalit të sfidave mes tyre gjatë gjithë historisë, Partizani kryeson ndjeshëm pasi ka regjistruar më shumë se 3-fishin e fitoreve të Skënderbeut, 64 të 15-herë kampionëve kundrejt 21 të bardhekuqëve. Partizani do të kërkojë të ndalë Skënderbeun dhe të rihapë kampionatin, pasi në rast triumfi të korçarëve atëherë titulli kampion do të ishte drejt bardhekuqëve që në këtë fazë të dytë.
Sa i përket formacioneve që mund të zbresin në fushë dy gjigantët e kampionatit shqiptarë, nuk pritet të ketë shumë ndryshime. Starova edhe pse nuk do të jetë në stol gjatë ndeshjes, pritet që ti besojë 11-tëshes që një javë më parë mposhti Kukësin në “Zeqir Ymeri”. Ndërsa Daja pritet ti besojë sërish formacionit që mposhti Dinamos e Kievit, duke shpresuar në një fitore sot Skënderbeu do të ishte i vetëm në majën e kampionatit dhe do ta kishte më të lehtë garën në vazhdim.
Partizani(4-4-2):Hoxha, Ibrahimi,Atanda, Malota,Kalari, Batha, Vila, Asani, Trashi, Progni, Bardhi.
Skënderbeu:(4-3-3):Shehi, Taku,Radas, Aliti,Mici, Osmani, Lilaj, Muzaka, Gavazaj, James, Sowe.
