Jo vetëm AAK dhe Nisma janë për një mocion mosbesimi për Qeverinë e Kosovës. Është edhe Lëvizja Vetëvendosje, ajo e cila mbështet iniciativën e kreut të Nismës, Fatmir Limaj, për një mocion mosbesimi për Qeverinë LDK-PDK, që udhëhiqet nga kryeministri Isa Mustafa.
Por, kryeministri i Kosovës, Isa Mustafa, nuk shqetësohet për këtë nismë, duke thënë se opozita s’ka me çfarë të merret, veçse të kërkoj zgjedhje.
Limaj në një status në rrjetin social Facebook, ka thënë se si pasojë e kësaj qeverisje, vendi tashmë një vit e gjysmë është në krizë politike, duke mos arritur të adresojë dhe të zgjidhë as edhe një problem me të cilin ballafaqohet Kosova.
Madje sipas tij, ka një mosbesim dhe mosfunksionim total, brenda vet kabinetit qeveritar, sikurse të gjitha institucionet e vendit në tërësi janë jofunksionale. “E vetmja zgjidhje për të dalë vendi ynë nga kjo situatë, janë zgjedhjet e lira dhe demokratike. Prandaj i takon opozitës që të nisë iniciativën për mocion mosbesimi për këtë qeveri dhe me këtë t’i hapim rrugë zgjedhjeve. Unë, në emër të NISMA-s thërrasë të gjitha grupet parlamentare opozitare në Kosovë që ta ndërmarrin këtë iniciativë dhe me këtë t’ju mundësojmë të gjithë deputetëve të parlamentit që të shprehen përmes votës për mocionin e mosbesimit dhe kështu të dalim nga kjo situatë e krijuar, e në të cilën asgjë nuk po funksionon”, ka shkruar Limaj në Facebook.
Idenë e Limajt po e mbështesin edhe partitë e tjera opozitare. Deputeti i Lëvizjes Vetëvendosje, Rexhep Selimi, tha për KosovaPress, se do të përkrahin çdo iniciativë kundër kësaj Qeverie, edhe mocionin e mosbesimit.
“Askush nuk do të duhej të priste nga Vetëvendosje diçka ndryshe, përveçse një pozicionim kundër kësaj Qeverie, qoftë edhe me mocion. Prandaj është e kuptueshme dhe i pritshëm qëndrimi i Lëvizjes, se do të mundësojmë çdo shans që të jepet për ta çuar vendin në zgjedhje si zgjidhje të problemeve. Legjitimiteti i kësaj Qeverie ka munguar qysh në fillim, por kjo qeveri përveçse jolegjitime është edhe jolegale, sidomos prej vendimit të Kushtetueses, kur këtë qeveri e nxjerr shkelëse të kushtetutës me rastin e ‘Zajednicës’”, tha Selimi.
Sipas tij, edhe pse pushteti ka mbi dy të tretat e deputetëve, po shihet se tashmë kanë ndryshuar raportet brenda vet koalicionit, çka tregon se duhen zgjedhje të parakohshme.
Por, kryeministri i Kosovës, Isa Mustafa, nuk shqetësohet nga nismat e opozitës për mocion mosbesimi, duke thënë se nuk kanë punë tjetër veçse të kërkojnë zgjedhje. Madje, sipas tij, opozita ka filluar të merret me këtë prej dy vjetësh, duke mos pasur me çfarë të merret tjetër.
“Unë jam i preokupuar me punë të përditshme të Qeverisë, jam i preokupuar me hapjen e perspektivës zhvillimore, me stabilitetin politik dhe ekonomik të vendit. Opozita nuk ka asnjë punë tjetër përveç se të kërkoj zgjedhje të shpall mocione të ndryshme, prandaj është punë e opozitës. Unë e respektoj opozitën, por më shumë e respektoj nevojën që ne të bëjmë punë, të hapim mundësi për punësim, për integrime evropiane”, tha Mustafa.
Inicimi i mocionit të mosbesimit, ka disa procedura se si duhet të bëhet. Albert Krasniqi nga Instituti Demokratik i Kosovës, që monitoron punën e Kuvendit, thotë se opozita e ka të vështirë inicimin e kësaj nisme, meqë duhen 40 nënshkrime të deputetëve, të cilat pa ndihmën e deputetëve të pozitës nuk mund t’i arrijnë.
