Partia Demokratike dhe Partia e Lirisë i janë drejtuar sot (5 mars) Gjykatës Kushtetuese për të kërkuar heqjen e mandatit të deputetit socialist Vullnet Sinaj, duke e akuzuar se ka përfituar 36 mijë euro nga buxheti i shtetit përmes bizneseve të tij.
Opozita argumenton se ky përfitim bie në kundërshtim me ligjin për konfliktin e interesit dhe papajtueshmërinë e mandatit të deputetit.
Kërkesa e opozitës është nënshkruar nga 14 deputetë të PD dhe Partisë së Lirisë, të cilët i kërkojnë Gjykatës Kushtetuese që të detyrojë Kuvendin për dërgimin e mocionit të tyre në këtë institucion.
Lista e deputetëve nënshkrues: Gazment Bardhi, Flamur Noka, Elda Hoti, Lefter Gështenja, Edi Paloka, Sorina Koti, Erisa Xhixho, Qani Xhafa, Petrit Doda, Eralda Bano, Dhurata Çupi, Kasëm Mahmutaj, Saimir Koreshi dhe Ina Zhupa.
Kuvendi kishte refuzuar më herët të dërgonte kërkesën në Gjykatën Kushtetuese, duke mos e përfshirë në rendin e ditës, ndaj opozita ka vendosur të ndjekë këtë rrugë ligjore përmes 1/10 e deputetëve që parashikon Kushtetuta.
Kjo lëvizje vjen në një moment kur parlamenti është në fund të mandatit të tij dhe ndërsa pritet të nisë fushata elektorale për zgjedhjet parlamentare të 11 majit.
