Tek Partizani nuk ka aq probleme sa mendohet dhe se disa çështje që janë trajtuar gjerësisht në media, nuk gjejnë baza tek klubi. Çani dhe Sukaj nuk kanë probleme ata janë lojtarë të Partizanit dhe pritet që të japin kontributin e tyre në pjesën e mbetur të sezonit për të arritur objektivat. Po ashtu nuk ka krizë në ekip dhe nuk do të ketë spastrim, por në merkaton e janarit do të ketë ndërhyrje vetëm aty ku ka probleme për të forcuar ekipin, janë fjalët e drejtorit sportiv Olsi Rama në një intervistë për “Supersport.
Për kampionatin?
E kemi mbyllur vitin me një fitore të rëndësishme ndaj Vllaznisë. Kjo ishte një fitore e bukur pasi erdhi me një lojë të mirë nga ana e Partizanit, sidomos në pjesën e dytë të takimit. Tashmë do ta nisim vitin e ardhshëm me një atmosferë pozitive dhe do të shohim të ndërhyjmë atje ku ekipi ka nevojë.
Për merkaton?
Merkato është një kampionat brenda kampionatit. Ajo mbart brenda intrigën e tifozëve dhe interesin e sportdashësve. Deri tani kemi sjellë dy futbollistë në ekip, por do të afrohen lojtarë të tjerë në varësi të nevojës që ka ekipi. Ajo që dua të them është se merkato e janarit është ndryshe nga ajo e verës.
Çështja Edgar Çani?
Edgar Cani është ende një lojtar i Partizanit. Ne e kemi pritur deri tani pasi nuk ka pasur gjendjen shëndetësore në nivelin e duhur. Mjeku i ka garantuar futbollistit se me një ndërhyrje në gju, mund të rikthehet brenda 1 muaji në 100% e tij. Edgari do të na shërbente për pjesën e mbetur të kampionatit.
Çështja Xhevahir Sukaj?
Sukaj ka marrë leje nga ekipi dhe të gjitha këto që po përfliten për të janë vetëm fjalë. Unë kam shumë besim tek Sukaj si njeri, por do të shohim se çfarë do të bëhet për të ardhmen e tij.
Për objektivat e klubit?
Derisa matematika të na detyrojë të heqim dorë, objektivat janë aty. Dëshira jonë është që këto objektiva t’i realizojmë me një lojë të bukur”, është shprehur Olsi Rama.
