Brazili nuk është sforcuar shumë përballë Meksikës dhe me një fitore të pastër 2-0 ka kaluar në çerekfinale. Ishte një Neymar në formë mjaft të mirë që shkëlqeu në këtë sfidë me një gol dhe një asist. Brazili nuk ishte në maksimumin e tij duke parë yjet që ka në skuadër, pasi Meksika kontrolloi një pjesë të mirë të ndeshjes edhe pse asnjëherë nuk e vunë në provë portierin Alisson.
Ndeshja fillon në ritme të larta dhe janë meksikanët që hidhen në sulm dhe shpërthejnë nga krahët duke u përpjekur të ndëshkojnë kundërshtarin sa më shpejt. Por Brazili është mjaft i qëndrueshëm në prapavijë dhe në momentin që hidhen në sulm bëhen mjaft të rrezikshëm. Sulmi brazilian vërteton edhe njëherë se krijon shumë raste të rrezikshme, por i mungon saktësia në goditjen finale. Neymar dhe Coutinho provojnë të asistojnë për Jesus në sulm, por meksikanët kanë një garanci në portë që quhet Ochoa.
Në pjesën e dytë Brazili duket që ka zbritur në fushë për të zgjidhur ndeshjen dhe goli nuk vonon më shumë se 6’ minuta. Është Neymar që hidhet në sulm me topin dhe e lë atë në mënyrë të mrekullueshme për Willian me finte, ky i fundit depërton në ta majtë të zonës dhe e hedh topin në qendër të saj ku ndodhet Neymar i cili e shtyn në rrjetë. Një gol mjaft i bukur që cliron yllin e PSG-së dhe i jep avantazhin Brazilit.
Në vazhdim Brazili kujdeset për të administruar rezultatin edhe pse sulmet e shumta nuk mungojnë. Meksikanët fillojnë të luajnë një futboll të fortë me shumë faulle dhe targeti i tyre është pikërisht Neymar. Në minutat e fundit Tite hedh në fushë Firmino, i cili pas një shpërthimi në krah të Neymar e nxjerr me portë të boshatisur duke i shënuar golin e dytë Meksikës, golin e nokautit.
Brazili nuk ka shpenzuar shumë energji për të kaluar në çerekfinalet e Botërorit të Rusisë dhe duhet të presë kundërshtarin, që do ta njohë pas përfundimit të sfidës Belgjikë-Japoni.
