Kolegji i Posaçëm i Apelimit ka shpallur sot vendimin për çështjen, që lidhet me ankimin e bërë nga Arqile Basho, subjekt rivlerësimi, kundër vendimit të Komisionit të Pavarur të Kualifikimit.
Trupi gjykues i KPA-së, i përbërë nga Sokol Çomo në rolin e kryesuesit, Albana Shtylla si relatore dhe anëtaret Ina Rama, Mimoza Tasi e Natasha Mulaj, pas shqyrtimit të çështjes në dhomë këshillimi, vendosi me shumicë votash për përfundimin e procesit të rivlerësimit për Arqile Bashon pa një vendim përfundimtar.
Në vendim theksohet se “objekti dhe qëllimi i këtij procesi është bërë i pamundur”, duke iu referuar nenit 4, pika 6 të ligjit për vetingun, nenit 64 të ligjit për statusin e gjyqtarëve dhe prokurorëve, si dhe nenit 95 të Kodit të Procedurave Administrative.
Në praktikë, kjo do të thotë se procesi për Bashon mbyllet pa një përfundim zyrtar, një situatë që ngre pikëpyetje për rrjedhojat në karrierë, nëse do të ketë ndonjë.
Njoftimi për shtyp:
Trupi gjykues i Kolegjit të Posaçëm të Apelimit, i përbërë nga Sokol Çomo kryesues, Albana Shtylla relatore, Ina Rama, Mimoza Tasi, Natasha Mulaj anëtare, shpalli vendimin për çështjen nr. 12/2022, datë 17.02.2022, që i përket ankimit të subjektit të rivlerësimit Arqile Basho kundër vendimit të Komisionit të Pavarur të Kualifikimit nr. 486, datë 15.12.2021.
Në përfundim të gjykimit në dhomë këshillimi, trupi gjykues, bazuar në nenin 4, pika 6 e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në nenin 64, pika 1, shkronja “c” e ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë”, i ndryshuar, si dhe në nenin 95 të Kodit të Procedurave Administrative, me shumicë votash, vendosi:
Përfundimin e procesit të rivlerësimit kalimtar për subjektin e rivlerësimit Arqile Basho pa një vendim përfundimtar për çështjen, për shkak se objekti dhe qëllimi i këtij procesi është bërë i pamundur.
U shpall sot, në Tiranë, më datë 02.06.2025.
