Eksperti i sigurisë Fatjon Softa komentoi ngjarjen e rëndë të ndodhur sot në burgun e Peqinit, ku një i dënuar me burg përjetë vrau me armë zjarri një të dënuar tjetër dhe plagosi një.
Referuar dyshimeve se arma e zjarrit me të cilën u krye vrasja mund të jetë futur në ambientet e burgut me anë të një droni, eksperti bëri thirrje se dronët duhet të ndalohen duke u klasifikuar si armë zjarri pasi me to mund të kryhen krime.
“Në të gjitha vendet e BE, në vende të sigurisë së veçantë si portet, aeroportet, burgjet, kanë një sistem antidronë, droni në vetvete është një frekuencë. Me këto sisteme deri në një distancë deri 15 km nuk ke mundësi ta ngresh dot një dron. E dyta të gjitha dronet që janë të një niveli amator nuk kanë mundësi të transportojnë objekte të rënda, ata profesionalë duhet të kenë licencë, të jetë i regjistruar, numri i dronit, ku është blerë, droni duhet të konsiderohet armë, se me të mund të organizosh jo vetëm transport droge por edhe sulme terroriste, ndaj duhet të jenë të përcaktuar të cilit niveli janë”, tha Softa.
