Deputetët e PD-së, Bledjon Nallbati dhe Ilda Dhori ishin të ftuar në emisionin “Të Paekspozuarit’ në MCN Tv për të folur për protestën e lajmëruar nga opozita më 7 tetor. Nallbati nuk dha detaje, por tha se kjo nuk do të jetë protestë si të tjerat, me fjalime dhe deklarata dhe se çfarë do të ndodhë atë ditë, varet nga pjesëmarrja, por edhe nga vullneti i njerëzve që do të jenë atje.
Pjesë nga biseda
Bledjon Nallbati: Duke patur parasysh situatën ku ka arritur Shqipëria, padiskutim jemi detyruar të ndryshojmë strategji, të mos kemi të njëjtën qasje që kemi patur. Jemi në një pikë ku shteti ka rënë dhe nuk ekziston më formalisht.
E gjithë kjo situatë, nëpër media diskutohet se ishte shkëndija, burgosja e kolegut tonë Salianjit.
Diskutimi ynë në struktura se cili do të ishte raporti me qeverinë, ishte momenti kur nuk u zbatuan vendimet e Gjykatës Kushtetuese. Një qeveri që nuk respekton vendimin e Gjykatës Kushtetuese.
Ylli Rakipi: Të hënën çfarë ndodh? Jemi gjithë merak.
Bledjon Nallbati: Nuk mund të prisni detaje nga unë, se cili është skenari. Por, po ju them një gjë. Të hënën është thirrur një protestë kombëtare ku të gjithë qytetarët, që gjykojnë se ky nuk është vend normal dhe demokratik, nuk do të jetë protestë si të tjerat, me fjalime dhe deklarata. Pastaj se çfarë do të ndodhë atë ditë, varet nga pjesëmarrja, por edhe nga vullneti i njerëzve që do të jenë atje.
Ylli Rakipi: Udhëheqja juaj ju ka bërë me dije se çdo të thotë mosbindje civile?
Bledjon Nallbati: Kemi filluar atë përplasje, betejë në parlament, për arsyet që rendita, kemi thirrur qytetarët në protestë, duke kërkuar mbështetjen e tyre. Ne nuk pretendojmë se 40 deputetë do të rrëzojnë qeverinë, ne do t’i prijmë kësaj beteje. Nëse qytetarët e gjykojnë se duhet ta bëjnë këtë betejë, do të vazhdojmë. Mosbindja civile do të thotë betejë në të gjithë nivelet e saj.
