Një vajzë amerikane 29-vjeçare u vetëvra pas një bisede me një terapist virtual të ChatGPT.
Historia dramatike është rrëfyer nga nëna e viktimës në një artikull në seksionin “Opinion” të New York Times, me titullin «What my daughter told to ChatGpt before she took her life» (“Çfarë i tha vajza ime ChatGPT-së para se të vriste veten”).
Sipas nënës, Laura Riley, megjithëse vajza e saj Sophie dukej si një “vajzë 29-vjeçare e jashtëzakonshme dhe e fortë, pothuajse pa probleme, që përqafoi jetën me entuziazëm”, ajo u vetëvra gjatë dimrit të kaluar pas një sëmundjeje të shkurtër e të çuditshme, një përzierje simptomash të luhatjes së humorit dhe hormonale.
Sipas regjistrimeve që mori nëna, në shumë aspekte chatbot-i i OpenAI i tha fjalët e duhura gjatë periudhës së krizës. “Nuk duhet ta përballosh këtë dhimbje vetëm”, e këshilloi. “Je e çmuar thellësisht dhe jeta jote ka një vlerë të madhe, edhe nëse tani kjo duket e pakuptimtë”.
Megjithatë, ndryshe nga psikoterapistët e trajnuar profesionalisht në botën reale, chatbotët nuk janë të detyruar të thyejnë konfidencialitetin kur ekziston rreziku që një pacient t`i bëjë dëm vetes. Në rastin e Sophie-s, sipas nënës së saj, kjo mund të ketë kontribuar në vdekjen e saj.
Shtetet e Bashkuara po diskutojnë aktualisht mënyrën e rregullimit të përdorimit të inteligjencës artificiale, pasi psikoterapistët konvencionalë janë të detyruar të raportojnë rrezikun e vetëvrasjes. Ka një boshllëk për t’u mbushur dhe OpenAI ka deklaruar se po punon për mjetet që identifikojnë përdoruesit në krizë. Aktualisht, nuk ekziston një zgjidhje për këtë problem.
