Pas largimit të trajnerit qipriot Kostantinidesit nga stoli i Kombëtares Shqiptare të Basketbollit, duket se një tjetër helen do ta trashëgojë atë. Zërat nga brenda FSHB thonë se si pasardhës shihet Antonios Dukas, i cili aktualisht është në stolin e kampionëve të Tiranës. Kjo ndoshta pasi ekipi kryeqytetas është edhe baza e ekipit kombëtarë.
Por nëse i hedhim një vështrim karrierës së 45-vjecarit , ai nuk ka drejtuar asnjëherë si trajnerë i mirëfilltë por si ndihmëstrajner. Si trajner ka punuar në Greqi edhe në Bullgari por në nivele të ulëta, zotëron gjuhën angleze, bullgare dhe serbe. Emërimi i Dukas pritet të bëhet brenda muajit shtator edhe pse Kostantinidesit i skadon kontrata në fund të vitit me FSHB, pasi kombëtarja e basketbollit në nëntor do të marrë pjesë në eliminatoret e ‘Evropianit të 2021’-it.
Kombëtarja kuqezi do të jetë ne grupin B, ku do të ketë kundërshtarë Danimarkën dhe Armeninë. Ndeshja e patë do të zhvillohet në 24 nëntor 2017, ndërsa dy ndeshjet e tjera brenda shkurtit të vitit të ardhshëm. Performanca e Shqipërisë në eliminatoret e ‘Botërorit 2019’ kanë lënë për të dëshiruar, pasi kombëtarja nën drejtimin e qipriotit nuk arriti të merrte asnjë rezultat pozitiv. Presidenti i Federatës së Basketbollit Shqiptarë, Avni Ponari, ka theksuar se janë rreth 5-6 kandidatura që do të shqyrtohen për të zëvendësuar Kostantinidesin, por duket se favorit për stolin mbetet Dukasi.
