Një arkitekt italian ka dalë vullnetar, për të rindërtuar urën në Xhenova, ku humbën jetën 43 persona.
Arkitekti që dizenjoi ndërtesën Shard në Londër, Renzo Piano, është shprehur i gatshëm për të dhënë kontributin e tij në rindërtimin e urës Morandi.
“Jam dhe do të isha i lumtur të përfshihesha në rindërtim, sepse ky është misioni im”, ka deklaruar ai.
“Gjithashtu jam senator përjetë në parlamentin italian, dhe si rrjedhojë është detyra ime të reagoj në katastrofa të tilla”.
Ai ka shtuar më tej se cilado strukturë që të zgjidhet, duhet të përcjellë mesazhin e “krenarisë dhe vlerave”.
“Duhet të jetë patjetër e bukur, jo në sensin kozmetik, por në përcjelljen e mesazhit të vërtetës dhe krenarisë”, tha ai.
“Duhet të jetë një vend ku njerëzit ta kujtojnë tragjedinë, por edhe të shërbejë si hyrje për qytetin. Gjithë kjo, duhet arritur pa asnjë shenjë retorike, kjo është më e vështira”.
