Nga data 1 mars, kanë hyrë në fuqi kontrollet kufitare mes Kosovës dhe Shqipërisë. Kjo ka shkaktuar krijimin e radhëve të gjata, veçanërisht në orët e paradites në anën kosovare të kufirit, ndërsa pasdite dhe në mbrëmje radhët janë më të dukshme në hyrje të Shqipërisë.
Drejtuesit e automjeteve nga të dyja anët e kufirit kanë kërkuar që kontrolli i dokumenteve të mos zbatohet dhe të respektohet marrëveshja për lëvizjen e lirë, që parashikon kalimin pa pengesa në kufi.
Pritjet janë më të gjata për drejtuesit e mjeteve të tonazhit të rëndë, me vonesa që arrijnë deri në dy orë. Ndërkohë, në të dyja anët e kufirit po punohet me tetë sportele, por fluksi i lartë i lëvizjes ka bërë që radhët të mbeten të pranishme.
Marrëveshja e lëvizjes së lirë mes dy vendeve kishte hyrë në fuqi në fund të muajit maj të vitit të kaluar, duke synuar eliminimin e radhëve kufitare për shtetasit e Kosovës dhe Shqipërisë, por duket se kontrolli i dokumenteve ka bërë që fluksi i lëvizjes të mbetet i ngarkuar.
