Pas urdhrit të dhënë një ditë më parë nga kryeministri Edi Rama për lirimin e hapësirave publike nga zaptimet abuzive, në qytetin e Vlorës kanë nisur aksionet për kthimin e sipërfaqeve të uzurpuara në shërbim të qytetarëve.
Kryetari i Bashkisë së Vlorës, Ermal Dredha, përmes një njoftimi në rrjetet sociale deklaroi se nuk do të ketë asnjë tolerim për zaptuesit e hapësirave publike, ndërsa premtoi aksione të përditshme në të gjitha zonat problematike.
“Abuzimet janë të shumta, prandaj do të vijojmë çdo ditë aksionet për lirimin e sipërfaqeve që u përkasin qytetarëve!”, u shpreh Dredha, duke theksuar se sezoni turistik nuk mund të jetë justifikim për shkeljen e ligjit apo uzurpimin e hapësirave të përbashkëta.
Operacionet për prishjen e ndërtimeve pa leje dhe largimin e objekteve që pengojnë qarkullimin apo aksesin publik pritet të përfshijnë të gjitha zonat urbane dhe bregdetare të qytetit. Autoritetet lokale kanë bërë thirrje për bashkëpunim dhe vetëkorrigjim, për të shmangur masa të mëtejshme ndëshkuese.
