Një sherr që ka degraduar në përplasje fizike raportohet të ketë ndodhur në qytetin e Vlorës. Një punonjës i kompanisë shtetërore të sigurisë ‘Ilirian Guard’ rreth 36-vjeç, është dhunuar barbarisht gjatë orarit të punës.
Sipas raportimeve të Syri Tv, konflikti ka nisur pas një mosmarrëveshje mes 36-vjeçarit dhe një personi tjetër që punon shofer i drejtuesit të një institucioni në Vlorë, i cili refuzoi të lëvizte makinën, edhe pse punonjësi ia kërkoi. Pas përplasjes, shoferi është larguar, por është kthyer më vonë me dy djemtë dhe shokët e tyre.
Ata e kanë goditur punonjësin me mjete të forta në kokë dhe trup. Ngjarja është mbajtur e fshehtë ndërkohë personat që dhunuan 36-vjeçarin janë të lirë.
Bëhet me dije se për ngjarjen është shoqëruar vetëm Selman Luzi, i cili thuhet se pasi është mbajtur disa orë është lënë në gjëndje të lirë. Ndërkohë raportohet se 36-vjeçari i dhunuar ndodhet në Spitalin e Vlorës prej tre ditësh.
