Ngërçi politik në Maqedoni vazhdon, teksa është bllokuar procesi i zgjedhjes së kreut të parlamentit dhe formimit të qeverisë.
Partia VMRO-DPMNE vazhdon të mos lëshojë pe, madje kërcënon me trazira, nëse qeverisjen e marrin socialdemokratët.
Kështu, qindra protestues dalin rrugëve të Shkupit në kundërshtim të asaj që e konsiderojnë “federalizim të Maqedonisë nga rreziku i zyrtarizimit të gjuhës shqipe”, të mbështetur nga partia e ish-kryeministrit Gruevski.
Përfaqësues të Parlamentit Evropian kanë kërkuar që të respektohen proceset demokratike dhe që shumicës së deklaruar parlamentare t’i mundësohet formimi i qeverisë, për t’i dhënë kështu fund krizës politike në vend, shkruan VOA.
Megjithatë, një numër analistësh shprehen se Bashkimi Evropian dhe SHBA-të nuk po përfshihen aq sa duhet në zgjidhjen e ngërçit më se dy vjeçar të Maqedonisë dhe se po presin që drejtuesit e këtushëm politikë të merren vetë me problemet e brendshme.
Kjo shikohet si kriza më e vështirë politike dhe institucionale, në të cilën ka rënë vendi, ndonëse zgjedhjet e 11 dhjetorit synonin t’i jepnin fund asaj.
