Kryeministri Edi Rama ka mbërritur ditën e djeshme në Izrael, 25 janar, në kuadër të një vizite pune që po zhvillohet në Jeruzalem, me në fokus pjesëmarrjen e tij në Konferencën Ndërkombëtare për Luftën kundër Antisemitizmit.
Menjëherë pas mbërritjes, ai ka ndarë në rrjetet sociale disa foto nga Nova Site.
“Stacioni i parë i vizitës në Izrael, një vend që kumbon pa fjalë! Mes humbjeve rrëqethëse, një pyll festash i kthyer pas një kasaphane të patregueshme në një tempull reflektimi për jetën, urrejtjen dhe çmimin e paqes”, shkruan kreu i qeverisë.
Vizita e kryeministrit vijon edhe sot, më 26 janar. Nga ora 11:00 deri në 12:30, Edi Rama do të zhvillojë një takim kokë më kokë me homologun e tij, Benjamin Netanyahu, i cili do të pasohet nga takimi mes dy delegacioneve dhe një deklaratë për shtyp.
Paralelisht, bashkëshortja e Kryeministrit, Linda Rama, në shoqërinë e bashkëshortes së Presidentit të Izraelit, Isaac Herzog, do të vizitojë Bibliotekën Kombëtare.
Në orën 14:00, Rama, i shoqëruar nga bashkëshortja, do të mbërrijë në Knesset “Plaza”, Parlamenti i Izraelit, ku do të pritet me një ceremoni të posaçme shtetërore nga Kryetari i Knessetit. Ceremonia përfshin rojet e nderit, ekzekutimin e himneve kombëtare dhe vendosjen e kurorave në monumentin e ushtarëve të rënë dhe në monumentin e viktimave të terrorit.
Më pas, numri një i kabinetit do të firmosë Librin e Përshtypjeve në Hollin Shagall dhe do të zhvillojë një takim me Kryetarin e Knessetit, Amir Ohana.
Në orën 16:15, do të nisë seanca plenare speciale e Knessetit, ku do të mbajnë fjalën Kryetari i Knessetit, Kryeministri i Izraelit Benjamin Netanyahu, lideri i opozitës Yair Lapid dhe Kryeministri Edi Rama, i cili do t’i drejtohet Parlamentit izraelit me një fjalim të posaçëm, sipas një protokolli të rezervuar për një numër të kufizuar liderësh të huaj.
Në orën 17:15, do të zhvillohet një pritje zyrtare në nder të Kryeministrit Rama, në Jerusalem Hall të Knessetit, me pjesëmarrjen e ambasadorëve dhe të ftuarve të posaçëm, ndërsa Linda Rama do të ketë një takim të veçantë me gratë parlamentare.
Më 27 janar, Kryeministri Edi Rama do të marrë pjesë në Konferencën Ndërkombëtare për Luftën kundër Antisemitizmit, ku do të mbajë një fjalë në praninë e Presidentit të Izraelit, Isaac Herzog.
Gjatë qëndrimit në Jeruzalem, kryeministri do të kryejë gjithashtu vizita simbolike në Western Wall (Muri i Lotëve) dhe në Kishën e Varrit të Krishtit.
