Policia ka arrestuar ditën e somte disa persona në Tiranë. Në pranga ra një 22-vjeçar, pasi dyshohet se ka ushtruar dhunë ndaj babait të tij. U arrestua një 21-vjeçar, pasi dyshohet se ka kryer një telefonatë të rreme në sallën operative dhe gjatë shoqërimit, ka kundërshtuar me dhunë punonjësit e Policisë.
Policia ka arrestuar një 29-vjeçar, pasi dyshohet se, nëpërmjet mashtrimit, i ka marrë automjetin një shtetasi, ndërkohë që ishte me masë sigurie “Arrest në shtëpi”. Gjithashtu është arrestuar një 25-vjeçar, pasi dyshohet se ka konsumuar elementë të veprës penale “Ngacmimi seksual” dhe, në mënyrë të përsëritur, ka ushtruar sjellje ngacmuese, fyese dhe cënuese ndaj fqinjëve të tij.
Specialistët për Hetimin e Krimeve të Komisariatit të Policisë Nr. 1:
• arrestuan shtetasin K. Xh., 22 vjeç, pasi dyshohet se ka ushtruar dhunë ndaj babait të tij;
• arrestuan shtetasin L. Sh., 21 vjeç, pasi dyshohet se ka kryer një telefonatë të rreme në sallën operative dhe, gjatë shoqërimit, ka kundërshtuar me dhunë punonjësit e Policisë;
• shpallën në kërkim shtetasin F. B., pasi dyshohet se, për motive të dobëta, ka goditur me grushte shtetasin S. K., si dhe i ka thyer xhamin e automjetit. Punohet për kapjen e tij.
Specialistët për Hetimin e Krimeve të Komisariatit të Policisë Nr. 2:
• arrestuan shtetasin E. P., 29 vjeç, pasi dyshohet se, nëpërmjet mashtrimit, i ka marrë automjetin një shtetasi, ndërkohë që ishte me masë sigurie “Arrest në shtëpi”; • arrestuan shtetasin A. B., 25 vjeç, pasi dyshohet se ka konsumuar elementë të veprës penale “Ngacmimi seksual” dhe, në mënyrë të përsëritur, ka ushtruar sjellje ngacmuese, fyese dhe cënuese ndaj fqinjëve të tij.
Specialistët për Hetimin e Krimeve të Komisariatit të Policisë Nr. 4:
• referuan materialet në Prokurori, ku nisi procedimi penal në gjendje të lirë për shtetasin A. K., pasi nuk i është bindur urdhrit të punonjësit të Policisë për ushtrimin e kontrollit të mjetit;
• punohet për shoqërimin e shtetasit K. H., pasi dyshohet se, në bashkëpunim me shtetas të tjerë ende të paidentifikuar, ka goditur dhe kanosur shtetasin O. D. Vijon puna për dokumentimin e plotë të rastit;
• punohet për shoqërimin e shtetases A. B., pasi dyshohet se ka dëmtuar banesën e një shtetasi. Vijon puna për dokumentimin e plotë të rastit.
Specialistët për Hetimin e Krimeve të Komisariatit të Policisë Nr. 6:
• referuan materialet në Prokurori, ku nisi procedimi penal në gjendje të lirë për shtetasit A. B. dhe A. M., pasi shtetasi A. B., për motive vetëgjyqësie, ka goditur me shpulla shtetasin A. M., i cili po kryente rrethimin e tokës së tij.
Specialistët për Hetimin e Krimeve të Komisariatit të Policisë Krujë:
• referuan materialet në Prokurori, ku nisi procedimi penal në gjendje të lirë për shtetasit A. T. dhe Rr. Ll., pasi u konstatuan në posedim të lëndëve piroteknike;
• referuan materialet në Prokurori për shtetasin E. P., 24 vjeç, pasi dyshohet se ka tentuar të kryejë marrëdhënie seksuale me një të mitur.
Specialistët e Qarkullimit Rrugor arrestuan shtetasit:
• E. L., 43 vjeç, pasi automjeti që dyshohet se drejtonte në gjendje të dehur u përplas me një motomjet dhe një automjet tjetër, vetëm me dëme materiale;
• Y. M., 37 vjeç, pasi u kap duke drejtuar automjetin pa leje drejtimi;
• L. V., 51 vjeç, pasi u kap duke drejtuar automjetin në gjendje të dehur; i cili më parë kishte përplasur një automjet me dëme materiale dhe më pas u përplas me murin anësor të një parkimi;
• E. A., 56 vjeç, pasi u kap duke drejtuar automjetin në gjendje të dehur;
• F. L., 43 vjeç, pasi automjeti që dyshohet se drejtonte në gjendje të dehur përplasi 2 punonjës policie në detyrë, të cilët po kryenin kontrolle policore. Si pasojë, u dëmtuan 2 punonjësit e Policisë, të cilët, pas marrjes së ndihmës mjekësore, dolën nga spitali.
Më datë 26.12.2025, në rrugën “Ded Gjon Luli”, një shtetas ende i paidentifikuar ka vjedhur një shumë parash në një dyqan. Punohet për identifikimin dhe kapjen e autorit. Materialet procedurale iu referuan Prokurorisë së Tiranës për veprime të mëtejshme.
