Edhe këtë vit duket se ka një rritje të çmimeve të shezlongëve në plazhet e Shqipërisë. Duket se çmimet janë të ndryshme sipas zonave të bregdetit shqiptar. Sipas informacioneve, për të bërë plazh në Shqipëri çmimet variojnë nga 300 lekë, që është çmimi më i lirë në Seman, deri në 300 euro që është çmim për persona që zgjedhin të frekuentojnë turizmin elitar në Ksamil.
“Në zonën e plazhit të vjetër çmimet janë 500 lekë për shezlong, ndërsa nëse flasim për Lungomaren, çmimet variojnë nga 700-800-1200 dhe në zona më ekskluzive duke ecur përgjatë Radhimës arrijnë 2500 lekë. Në këto zona ka një rritje të çmimeve në fundjavë”, -tha gazetarja e Euronews. Edhe në Velipojë çmimet duket se janë më të larta. Mësohet se në rreshtat e fundit çmimet nisin nga 500 lekë, ndërsa nëse i referohemi qendrës vlera shkon në 1500 lekë për 24 orë, por ka edhe nga ata që shkojnë 2000-2500 lekë.
Ndërsa çmimet më të kripura duket se edhe këtë verë mund t’i gjejmë në Sarandë. “Saranda është shumë më e lirë se Ksamili, në plazhet më minimaliste shezlongët fillojnë me 1000 lekë deri në 5000, ndërsa Ksamili fillon me 1500 në plazhet familjare dhe që janë më minimalist, ndërsa në të tjerat shkon 2000-3000, por kemi edhe turizmin elitar që nis nga 50 euro, 100-200-300 euro e më shumë duke pasur parasysh edhe shërbimet e tjera që ofrohen brenda paketës. Borshi, Buneci, Lukova vazhdojnë të kenë çmime ekonomike dhe çadrat shkojnë 1000-1500 lekë”, -tha gazetarja. Ndërkohë, në plazhin e Semanit çmimet variojnë nga 300 lekë deri në 500 lekë.
