Nesër më 27 maj është dita e parë e muajit të madhërueshëm të Ramazanit.
Më shumë se 1 miliardë myslimanë në mbarë botën nisin nesër agjërimin për muajin më të shenjtë në kalendarin mysliman.
Kryetari i Komunitetit Mysliman të Shqipërisë, Skënder bruçaj, uroi sot të gjithë besimtarët me rastin e fillimit të muajit të begatë.
“Ramazani është muaji i paqes, i solidaritetit dhe i mëshirës hyjnore. Ramazani është muaji ku dalin në pah vlerat universale humane; të bujarisë, të mirësisë, të dashurisë, te respektit ndaj njeri-tjetrit, vlerat që simbolizojne moralin e lartë shoqëror”, thuhet në mesazhin e urimit.
Bruçaj kujtoi se “ky muaj i begatë na sjell në vëmendje kujdesin dhe përkushtimin që duhet të kemi për njerëzit në nevojë, për jetimët, për individët me aftësi të kufizuara, dhe për të gjitha shtresat e tjera të shoqërisë që kërkojnë kujdesin tonë në përmbushjen e nevojave të tyre, në mënyrë që të mbretërojë mirësia, begatia, harmonia dhe paqja në të gjitha familjet shqiptare”.
Sipas fesë islame, agjërimi në Islam nënkupton përmbajtjen ndaj një veprim të caktuar.
Zakonisht kjo, nga besimtarët mysliman kuptohet si përmbajtja nga ushqimi dhe pijet nga koha para zbardhjes së ditës në mëngjes, deri në kohën e namazit të mbrëmjes.
Dita e Fiter Bajramit vjen në përfundim të muajit të Ramazanit, më 25 qershor dhe që këtë vit përkon edhe me mbajtjen e zgjedhjeve parlamentare.
