“Ruhuni nga unë se kur kam rrahur gruan a e di si më dukeni ju. Po i futa dhe një gotë raki”, kjo është deklarata që bëri Klodian Duro teksa po konsumonte darkën pas përfundimit të spektaklit të së shtunës.
E sigurisht që Vëllai i Madh mori menjëherë vendimin për t’a përjashtuar përfundimisht nga shtëpia më e famshme në Shqipëri.
Ish-futbollisti i Kombëtares ishte sot i ftuar në emisionin “Wake Up”, ku sqaroi deklaratën, ku sipas tij, ishte një ironi.
Duro gjithashtu u shpreh se nuk kishte pirë raki, dhe se kurrë nuk ka konsumuar raki.
“Situatat aty precipitojnë shumë shpejt. Të mbarosh Prime-n, të ulemi për darkën. E këtu ka qenë edhe pjesa. Darka ishte e ofruar nga një restorant që pjesë e menusë ishte edhe rakia. Por unë në veçanti nuk kam konsumuar asnjë lloj gote, as raki. Nëse vini re ato janë dhe gota uji që janë thjesht në mënyrë simbolike sepse realisht edhe në gjithë jetën time të përditshme, rakia nuk është pjesë e menusë time dhe nuk ka qenë kurrë.
Fatmirësisht jeta që kam bërë më ka dhënë mundësinë që të shijoj shumë pije të tjera të ndryshme, por jo rakinë. Aty ishte thjesht e gjithë batuta apo ironia që të gjithë mund t’a bëjnë në një moment, për t’i dhënë një përgjigje indirekte personit që ndoshta bën rolin e budallaqes sikur unë nuk dija gjë se ça po ndodhte në atë shtëpi, por unë dija gjithçka që po ndodhte”, tha Duro.
