Ministri i Jashtëm turk Mevlut Çavusoglu ka thënë se përplasjet e vendit me Greqinë për Detin Egje do të dërgohen për diskutim në Këshillin e Sigurisë Kombëtare. Ai ka treguar se ka një “opsion tjetër”, përveç diplomacisë për zgjidhjen e mosmarrëveshjes.
“A do ta zgjidhim këtë problem me Greqinë nëpërmjet diplomacisë apo do të shkojmë në gjykatë? Për ne ka një mundësi tjetër. Nëse Këshilli i Sigurisë Kombëtare do diskutojë ai patjetër që do japë një vendim”, tha ai.
“Ajo që ndodhi në 1996 ishte kriza e ishullit Imia. Asnjë qeveri nuk ka përgjegjësi për këtë krizë”, tha Cavusoglu, duke iu referuar një incidenti mbi një ishull të pabanuar në Egjeun lindor që i dërgoi të dy vendet në prag të luftës.
“Nuk ka pasur ndryshime de facto apo ligjore në këtë ishull,” shtoi ai, raporton ekathimerini.com.
Ndërsa përplasjet mes Greqisë dhe Turqisë për ishujt e diskutueshëm në Egje kanë qenë të shumta. Madje dy vendet nuk kanë nguruar që të nxjerrin në det edhe anijet e tyre luftarake.
Vetëm një muaj më parë deklaratat politike të qeverisë greke, bënë që Turqia të niste lëvizjen intensive të anijeve luftarake në Egje. Kryeministri Tsipras pati publikuar një deklaratë zyrtare. Në të thuhet se Greqia ka të drejtë në bazë të ligjit ndërkombëtar që të zgjerojë hapësirën e saj detare me 12 milje.
https://tiranatoday.com/ndizen-tensionet-anijet-turke-zbarkojne-ne-egje-reagon-greqia/
“Turqia do ta vazhdojë qëndrimin e vendosur në lidhje me Qipron, Sirinë dhe Libinë”
Ndërsa nënpresidenti i Turqisë, Fuat Oktay, tha se vendi i tij do të vazhdojë qëndrimin e tij “të drejtë dhe të fortë” në lidhje me Qipron, Sirinë dhe Libinë.
Fuat Oktay tha se arsyeja që çështja e Qipros ende nuk ka gjetur zgjidhje është qëndrimi i papajtueshëm i grekëve qipriotë që kanë adoptuar moszgjidhjen si parim. Këto deklarata ai i bëri duke folur në një ceremoni me rastine e 35-vjetorit të themelimit të Republikës Turke të Qipros Veriore.
“Turqia do të vazhdojë të shfaqë qëndrimin e saj të drejtë dhe të vendosur në lidhje me Qipron, Sirinë dhe Libinë”, deklaroi Oktay.
Oktay tha se Qiproja Turke është një nga dy pjesët themelore dhe të barabarta të ishullit dhe Turqia nuk do t’i lejojë qipriotët grekë ta injorojnë këtë fakt.
Republika Turke e Qipros Veriore u shpall më 15 nëntor të vitit 1983. Ajo njihet aktualisht vetëm nga Turqia si shtet i pavarur, raporton AA.
Ishulli mesdhetar lindor është ndarë që nga viti 1974, kur një grusht shteti grek qipriot u pasua nga dhuna kundër turqve të ishullit dhe ndërhyrja e Ankarasë si fuqi garantuese.
Negociatat mbi Qipron rifilluan pas Planit të Annanit të mbështetur nga OKB në vitin 2004 për të ribashkuar komunitetet turke dhe greke të Qipros.
Statusi i ishullit mbetet i pazgjidhur përkundër një sërë diskutimesh që rifilluan në maj të vitit 2015.
Përpjekjet e fundit për zgjidhje në Crans-Montana të Zvicrës nën mbikqyrjen e shteteve garantuese, Turqisë, Greqisë dhe Britanisë, dështuan vitin e kaluar.
