SH.K.A. Dulcinea, në festivalin kulturor-tradicional “Flakadani i Karadakut” 2017, ndahet me çmimin e Kostumografisë më autotktone.
Në kuadër të manifestimit tradicional-kulturor e sportiv “Flakadani i Karadakut” 2017 është mbajtur festivali i këngëve dhe valleve i ansambleve dhe grupeve të ndryshme nga mbarë trojet shqiptare, i cili ka zgjatur tri mbrëmje.
Me përfundimin e mbrëmjes së tretë, ka përfunduar edhe Festivali kulturor-sportiv “Flakadani i Karadakut” 2017, në Viti, që organizohet në nderim të dëshmorit të kombit nga Mogilla e Vitisë, Njazi Azemit, ku shoqata kulturore-artistike Dulcinea nga Ulqini mori pjesë në natën e tretë dhe të fundit të Festivalit mbarëkombëtar të këngës dhe valles shqipe, ngjarje me të cilën edhe ka përfunduar Manifestimi “Flakadani i Karadakut” 2017.
Sh.K.A. Dulcinea në programin e saj kishte “vallen e peshkatarit” dhe vallen me “motive ulqinake”, të përgatitur nga koreografi Musa Hoxha, nën udhëheqjen e muzikës së profesor Mustafa Zhugjelit. Këngëtari Nexhat Kaleziqi këndoi këngët “Tu u njit Bunës përpjetë” dhe “Oh pranver’ sa jam tu t’prit”
Kjo shoqatë u mirëpritë me duartrokitje të mëdha dhe la përshtypje shumë të mira në këtë festival me vallet, këngët dhe veshjen ulqinake.
Ndërkohë që juria profesionale e përbërë nga Sami Pira, Dilaver Kryeziu dhe Zija Aliu ka ndarë çmime për më të dalluarit, në kostumografinë më autotktone të festivalit u vlerësua Sh.K.A. Dulcinea nga Ulqini, solisten\kengën më të mirë të Festivalit, Sh.K.A. “Bajram Curri”, kurse vendin e parë e mori A.K.V. “Emin Duraku” nga Shkupi, vendin e dytë A.K.V. “Gjilani” nga Gjilani dhe vendi i tretë për ansamblin “Vaçe Zela” Lushnjë, ndërsa çmimin special e fitoi ansambli “Iliria” Suedi.
Sh.K.A. Dulcinea, më datën 16 maj do të marrë pjesë edhe në festivalin ndërkombëtar në Turqi, në qytetin Belek të Antalia-s, ku do të prezentojë Ulqinin me vallet, muzikën dhe veshjet ulqinake dhe shpresojnë se Komuna e Ulqinit, organizata turistike dhe afaristët do t’i ndihmojnë dhe përkrahin në këtë festival.
.
