Mandati i një ambasadori në seli diplomatike do të zgjatet në 4 vite. Në ligjin e ri të depozituar për konsultim publik, diplomatët shqiptarë së bashku me konsujt do të shërbejnë në misionet diplomatike një vit më shumë.
Ambasadorët shqiptarë mund të kryejnë misionin e tyre diplomatik, për 4 vite nga 3 që e kanë kryer deri më sot. Një projektligj i ri u jep mundësi atyre, të mbajnë postin edhe për një mandat të dytë, duke e çuar kështu shërbimin në një nga ambasadat shqiptare në botë për 8 vite.
E njëjta procedurë do të ndiqet edhe për konsujt me shërbim jashtë, ndërsa gjithashtu parashikohet se asnjë diplomat apo konsull nuk do të mund të ushtrojë funksionin e tyre për më shumë se dy mandate të njëpasnjëshme.
Gjithashtu me ligjin e ri, për t’u bërë ambasador apo konsull nuk ka nevojë për lidhje të domosdoshme me politikën e jashtme.
Ligji i hedhur për konsultim publik fut për herë të parë edhe konceptin e Akademisë Diplomatike. Kjo strukturë, në varësi të ministrisë së Jashtme: do të ketë si detyrë përgatitjen e trajnimin e diplomatëve dhe parashikohet t’i kushtojë buxhetit të shtetit 20 milionë lekë në vit.
Shqipëria ka shtruar diplomacinë e saj në 43 shtete të botës me nga një ambasadë dhe në disa nga këto 43 shtete ka shtruar edhe Konsullata të Përgjithshme.
