Një 75-vjeçare nuk i humbi kurrë shpresat se i biri i saj do të zgjohej nga koma. Dashuria e saj bëri që ajo të përkujdesej plot 12 vite për të birin, derisa më në fund ai hapi sytë.
Kjo histori ka ndodhur në Kinë, ku Wei Mingying shpenzoi të gjitha kursimet e jetës për të blerë medikamente për të birin. Madje, ajo kishte marrë edhe një borxh prej 13 mijë paund. Në këtë pikë, ajo ishte aq e varfër, saqë nuk kishte ushqim për të ngrënë për 1 muaj.
I biri i saj mbeti tetraplegjik pas një aksidenti në vitin 2006, kur ishte 36 vjeç. Ai jetonte vetëm me nënën, pasi i ati kishte ndërruar jetë kur ai ishte në moshë të re.
Gruaja do të niste ditën e saj në orën 05:00: ajo lante fytyrën e të birit, e ushqente, kujdesej për nevojat personale të tij, e masazhonte që të shmangte krijimin e plagëve nga regjimi në shtrat. Ajo kaloi 12 vite duke bërë të njëjtën gjë, por nuk u ankua asnjëherë.
Ajo humbi 20 kilogramë gjatë viteve, ndërsa pranon se shpesh pinte vetëm ujë, pasi nuk kishte mundësi të blinte ushqime. Tashmë i biri i saj është sërish i paaftë për të lëvizur ose folur, por ai mund ta dëgjojë e shikojë nënën e tij.
“Jam shumë e lumtur. Shpresoj që ai ta marrë veten plotësisht. Nuk do heq kurrë dorë nga ai. Shpresoj që një ditë të më thërrasë sërish nënë”, tha gruaja me lot në sy.
Pas historisë prekëse, lajmi ka bërë bujë në rrjet dhe shumë komentues kanë shprehur solidaritetin me të dhe e kanë përgëzuar për këtë gjë madhështore që ka bërë për të birin.
“Vetëm dashuria e një nënë mund ta bëjë këtë”, shkruan nja komentues për rastin rrëqethës./ Përshtati TIRANA TODAY
