Plot 2 mijë efektivë policie do të jenë të angazhuar në terren për të garantuar rendin dhe sigurinë në ndeshjen e kombëtares me Çekinë.
Në gatishmëri do të jenë edhe forcat speciale të RENEA-s, të cilat pak orë para nisjes së ndeshjes kryen kontrolle sigurie me qenë siç duket edhe në pamje.
Për të folur për sigurinë dhe organizimin sa më të mirë të ndeshjes, presidenti i FSHF, Armand Duka u takua me Ministrin e Brendshëm, Taulant Balla dhe drejtuesit më të lartë të Policisë së Shtetit.
“Qëllimi juaj dhe qëllimi jonë është që t’i krijojmë kushte sa më të mira atyre që do të jenë në stadium, spektatorëve, futbollistëve, medias dhe të gjithë bashkë kontribuojmë për të pasur një event fantastik dhe performancë shumë të mirë të ekipet, sepse e gjithë Shqipëria e pret këtë ndeshje me padurim, e pret për një rezultat padurim. Uroj që edhe rezultati t’i përgjigjet mobilizimit tuaj, mobilizimit të skuadrës, të gjithë Shqipërisë dhe uroj që të festojmë, të festojmë pa asnjë incident”, tha Duka.
Ministri i Brendshëm, Taulant Balla, ritheksoi angazhimin maksimal të policisë së shtetit për mbarëvajtjen e këtij takimi mjaft të rëndësishëm.
“Kushdo që do të tentojë të përdorë bileta të falsifikuara duhet të ketë parasysh që hyn në juridiksionin e ligjit dhe Policia e Shtetit në bashkëpunim me Prokurorinë do të marrë të gjitha masat. Publiku, sportdashësi duhet të kuptojë që nëse do të hidhen flakadanë në fushë, ndeshja e radhës në shtëpi dhe e fundit e kualifikueseve me Ishujt Faroe më 20 nëntor mund të zhvillohet me gjysmë stadiumi ose fare pa tifozë nëse ka incidente. Kush do që t’i bëjë dëm Kombëtares kuqezi do të jetë ai person që do të vijë i përgatitur me flakadanë dhe prandaj reagimi ynë kësaj radhe do të jetë shumë i forte”, tha Balla.
Në funksion të mbarëvajtjes së ndeshjes dyert e stadiumit “Air Albania” do të hapen që në orën 17:00, pasi do të ketë kontrolle të imtësishme në të gjithë kordonët e policisë si dhe do të bllokohen segmentet rrugore rreth stadiumit.
