Kreu i Partisë së Lirisë, Ilir Meta, ka ndarë një mesazh ngushëllimi nga qelia e burgut për ndarjen nga jeta të Haxhi Thaçit, babait të ish-presidentit të Kosovës, Hashim Thaçi.
Në një postim në Facebook, Meta ka shprehur pikëllimin e tij për këtë humbje dhe ka theksuar se familja Thaçi po kalon një moment të vështirë, veçanërisht për shkak të mungesës së Hashim Thaçit, i cili ndodhet në Hagë.
“I pikëlluar nga lajmi i hidhur për ndarjen nga jeta të Haxhi Thaçit, babait të luftëtarit të orëve të para të Ushtrisë Çlirimtare të Kosovës dhe ish-Presidentit të Kosovës, Hashim Thaçi. Ngushëllimet më të ndjera për Presidentin Thaçi dhe për familjen e dashur Thaçi, që në këto momente dhembjeje për humbjen e njeriut të tyre të dashur, përballet edhe me mungesën e Hashimit, i cili po mbron luftën çlirimtare të UÇK-së, që iu imponua popullit të Kosovës nga shtypja dhe gjenocidi kriminal i regjimit të Millosheviçit dhe që rezultoi se ishte e drejtë dhe vendimtare për Lirinë dhe Pavarësinë e Kosovës. I paharruar kujtimi i Bacës Haxhi! Të prehet në paqen e merituar!”, ka shkruar Meta.
Ky mesazh vjen në një kohë kur Gjykata Speciale në Hagë refuzoi kërkesën e Hashim Thaçit për të marrë pjesë në varrimin e të atit, një vendim që ka ngjallur reagime të shumta në Kosovë dhe Shqipëri.
