Mazhoranca ka kaluar me procedurë të përshpejtuar futjen në kalendar të pr.ligjit për t’i hapur rrugë shembjes dhe ndërtimit të Teatrit të Ri, pavarësisht se opozita në Kuvend e ka kundërshtuar.
Megjithatë kjo nuk ndali aktorë e aktivistë që të dalin të protestojnë sërish sot.
Regjisori Robert Budina edhe pas këtij votimi në parlament doli së bashku me artistë të tjerë kundër këtij projektligji duke u bërë thirrje politikanëve ta ndalin këtë masakër, shkruan bw.
“Situata është e rënë, ajo që ndodhi sot në parlament është atentat kundër demokracisë. Nëse ky projektligj kalon, dhe shoqëria nuk reagon atëherë jemi në kolaps të plotë. Nuk po flas për Teatrin Kombëtar, flas për shoqërinë shqiptare. Unë ju bëj një thirrje të reagojmë dhe t’u tregojmë deputetëve që ishin në parlament sot se ne nuk jemi me ngjyra politike, se ata e kanë në dorë fatin. Nuk duhet votuar ai ligj, të tregojnë qytetari që ashtu si ne kemi treguar këtu për 44 muaj nuk kemi bërë asnjë veprim të tejskajshëm. Ndaloni në këtë masakër që po i bëni vendit,” tha Budina.
